काठमाडौं । नेपाली कांग्रेसका प्रवक्ता प्रकाशशरण महतले संसदीय छानबिन समिति गठन गर्न ढिलाइ हुँदा त्यसको औचित्य झन् पुष्टि हुँदै गएको बताएका छन् ।

बुधबार संसद् भवन नयाँ बानेश्वरमा सञ्चारकर्मीसँग कुरा गर्दै उनले सहकारी प्रकरणमा गृहमन्त्रीमाथि छानबिन गर्न कांग्रेसले लगातार संसदीय समिति गठनको माग राख्दा पनि बेवास्ता गर्नुले छानबिनको औचित्य पुष्टि हुँदै गएको बताए ।

सहकारी प्रकरणमा संसदीय छानबिन समिति गठन गर्न तयार नहुनुले सहकारी प्रकरणमा गृहमन्त्रीको संलग्नता रहेको स्पष्ट भएको उनको भनाइ छ । उनले कुनै दोष नहुँदा संसदीय छानबिन समिति गठन गर्न अप्ठेरो मान्नुपर्ने अवस्था नै नरहेको धारणा राखे । महतले सरकार नै अप्ठेरो पर्ने डरले प्रधानमन्त्रीले पनि छानबिन समिति गठन गर्न नचाहेको जिकिर गरे ।

त्यस्तै, उनले कांग्रेसजस्तो संसदीय मर्यादामा चल्ने पार्टी अरू कुनै नरहेको पनि दाबी गरे ।