काठमाडौं । नेपाल दूरसञ्चार प्राधिकरणका बहालवाला ११ कर्मचारी एमडीएमएस खरिदसम्बन्धी भ्रष्टाचार प्रकरणमा मुछिएका छन् ।

मोबाइल डिभाइस म्यानेजमेन्ट सिस्टम (एमडीएमएस) खरिदमा भ्रष्टाचार भएको भन्दै अख्तियार दुरुपयोग अनुसन्धान आयोगले बिहीबार मुद्दा दायर गरेको थियो । अख्तियारले १९ जना र दुई कम्पनीविरुद्ध विशेष अदालतमा मुद्दा दायर गरेको हो । 

मुद्दा दायर गरिएकोमा दुईजना प्राधिकरणका पूर्वअध्यक्ष दिगम्बर झा र पुरुषोत्तमप्रसाद खनाल हुन् । अर्का एक प्राधिकरणकै पूर्ववरिष्ठ निर्देशक आनन्दराज खनाल छन् । यीबाहेक ११ जना प्राधिकरणको बहालवाला कर्मचारी छन् भने पाँचजना खरिदमा संलग्न कम्पनीका कर्मचारी हुन् ।

प्राधिकरणमा हाल कार्यरत रहेका निर्देशकहरू मीनप्रसाद अर्याल, दीपेश आचार्य र सुरेन्द्रलाल हाडालाई पनि भ्रष्टाचार गरेको आरोप लागेको छ । उपनिर्देशकहरू अच्युतानन्द मिश्र, विनोदचन्द्र श्रेष्ठ, रेवतीराम पन्थ, सन्दीप अधिकारी, विजयकुमार राय र सूर्यप्रसाद लामिछानेविरुद्ध पनि मुद्दा दायर भएको हो ।

यस्तै, प्राधिकरणकै सहायक निर्देशक प्रतीक्षा पौडेल र निराजन कोइरालालाई पनि अख्तियारले प्रतिवादी बनाएको छ ।

बाह्य कम्पनीका पाँचजना
एमडीएमएस खरिदमा संलग्न पाँचमध्ये चार कर्मचारी एउटै कम्पनीका हुन् । उनीहरू न्युमेरा (एस) एसडीएन बीएचडी, मलेसियाका हुन् ।  जसमा कम्पनीका ग्रुप चेयरमेन मोहद नूर अमीन बिन मोहद नूर खान, वार्तामा संलग्न मोहम्मद शिहाब बिन कुनही मोहम्मद, सीईओ अनुज सिंह एक्स र प्रडक्ट स्पेसलिस्ट जमिल अहमद छन् ।

यस्तै, न्युमेराको पार्टनर कम्पनी नमस्ते ग्लोबल कम प्राइभेट लिमिटेड सिंगापुरका निर्देशक कविन्द्रराज मल्लविरुद्ध अख्तियारले मुद्दा दायर गरेको हो । एमडीएमएस खरिदका नाममा राज्यकोषको ९१ करोड ९८ लाख ३० हजार ८८२ रुपैयाँ नोक्सानी भएको दाबी गर्दै अख्तियारले सोहीबमोजिम जरिबाना हुनुपर्ने माग गरेको छ ।

अख्तियारले भ्रष्टाचार निवारण ऐन, २०५९ को दफा ८ को उपदफा (१) बमोजिम कैद र खर्च भइसकेको २३ करोड २० लाख ५९ हजार ३१४ रुपैयाँ ९४ पैसा असुलउपर गर्न माग दाबी गरेको छ ।