काठमाडौं । पूर्वडीआईजीसमेत रहेका रास्वपा नेता रमेश खरेलले सो पार्टीबाट राजीनामा दिएका छन् । उनले रास्वपा र त्यसको नेतृत्वमाथि लगातार प्रश्न उठाएपछि उनलाई स्पष्टीकरण सोधिएको थियो ।

स्पष्टीकरणको जवाफ नदिइ उनले राजीनामा बुझाएका हुन् । खरेलले बुधबार रास्वपाको केन्द्रीय सदस्यसहित साधारण सदस्यसमेत नरहेनेगरी राजीनामा बुझाएका हुन् ।

खरेलले राजीनामा दिनुका तीन कारण उल्लेख गरेका छन् । पहिलो रास्वपालाई अहिले पाएको जनमतको ‘म्यान्डेट’ सरकार चलाउने होइन । त्यसैले म्याडेट विपरीत सरकारमा जाने कुरामा आफ्नो विमति रहेको उनले बताए ।

“रास्वपालाई जनमतले दिएको म्यान्डेट सरकार सञ्चालन गर्ने होइन, प्रतिपक्षबाट खबरदारी गर्ने हो,” खरेलले बाह्रखरीसँग भने, “त्यसमा ‘म्यान्डेट’ विपरीत सरकारमा जाने काम भयो । त्यसैले यो पार्टीमा बस्नु उपयुक्त ठानिन ।” खरेलले दोस्रो कारण स्वार्थको द्वन्द्वको प्र्रश्नमा भएको बेवास्तालाई देखाएक ाछन् । 

उनले सभापति रवि लामिछानेमाथि प्रश्न उठिसकेपछि उनीबाहेक सरकारमा जाने वा तत्कालका लागि मन्त्री पदमा नरहेर छानबिनमा सहयोग गर्नुपर्नेमा त्यस्तो हुन नसकेको उनको बुझाई छ । 

“दोस्रो कुरा ‘कन्फ्लिक्ट अफ इन्ट्रेष्ट’को प्रश्न उठ्यो । यो विषयमा नयाँ पार्टीले जवाफदेहिता देखाउनुपर्नेमा बलजफ्ती पदमा बसिरहने प्रवृत्ति देखियो,” खरेलले भने, “यो कारणले पनि जवाफदेहिताको पक्षमा रहेको व्यक्ति भएकाले म त्यो पार्टीमा बस्नु उपयुक्त ठानिन ।”

खरेलले तेस्रो कारण भने पार्टीभित्रको आन्तरिक लोकतन्त्र भएको बताएका छन् ।  एउटा लोकतान्त्रिक पार्टीमा आन्तरिक लोकतन्त्रको मूल्य हुने भन्दै एकल निर्णयबाट पार्टी चल्ने भएपछि लोकतन्त्रको अर्थ नरहेको उनको बुझाई छ । 

“सरकारमा जाने निर्णय हुँदा एक व्यक्ति भन्दा बाहिर सल्लाह र छलफलसमेत भएन,” खरेलले भने । 

उनले यी तीनवटा कारण देखाएर रास्वपाबाट अलग भएको बताएइका छन् । “अनुसन्धानको घेरामा भएको मान्छे सरकारमा जानै हुँदैनथ्यो, अझ आफैं त्यही मन्त्रालयमा जान मिल्छ ?,” उनको प्रश्न थियो ।

उनले रवि र प्रचण्डलाई तुलना गर्दै पार्टीमा छलफलबिना निर्णय गर्ने परिपाटीले समस्या निम्तिएको बताए ।