काठमाडौं । इन्डियन प्रिमियर लिग (आईपीएल)मा चेन्नाई सुपर किंग्सले लगातार दोस्रो जित निकालेको छ । चेन्नाईले मंगलबार भएको खेलमा गुजरात टाइटन्सविरुद्ध ६३ रनको सहज जित निकालेको हो ।

एमए चिदम्बरम रंगशालामा चेन्नाईले प्रस्तुत गरेको २०७ रनको लक्ष्य पछ्याउने क्रममा गुजरातले निर्धारित २० ओभरमा आठ विकेट गुमाएर १४३ रन मात्र बनाउन सक्यो । गुजरातका साइ सुदर्शनले ३७ रन बनाए । डेबिट मिलर र रिद्दिमान साहाले समान २१ रन थप्दा विजय शंकरले १२, अज्मतुल्लाह ओमरजाईले ११ र उमेश यादवले १० रन जोडे । 

चेन्नाईका दीपक चहर, मुस्ताफिजुर रहमान र तुसार देशपान्डेले समान दुई विकेट लिए । डार्यल मिचेल र मथिसा पथिरानाले एक–एक विकेट हात पारे । त्यसअघि टस हारेर ब्याटिङमा आएको चेन्नाईले निर्धारित २० ओभरमा ६ विकेट गुमाएर २०६ रनको योगफल खडा गरेको थियो । 

चेन्नाईका शिवम दुवेले ५१ रन बनाए । उनले २३ बलमा दुई चौका र पाँच छक्का प्रहार गरे । कप्तान रितुराज गाइकवाड र रचिन रविन्द्रले समान ४६ रन थपे । डार्यल मिचेलले २४, समीर रिज्वीले १४ र अजिन्क्या राहाणेले १२ रन जोडे । गुजरातका राशिद खानले दुई विकेट लिए । साई किशोर, स्पेन्सर जोन्सन र मोहित शर्माले समान एक विकेट लिए ।

जितसँगै दुई खेलबाट चार अंक जोडेको चेन्नाई तालिकाको शीर्ष स्थानमा उक्लिएको छ । समान खेलबाट दुई अंक जोडेको गुजरात तालिकाको छैटौँ स्थानमा छ ।