काठमाडौं । मस्कोस्थित कन्सर्ट हलमा आक्रमण गरी कम्तीमा १३७ जनाको हत्या आरोपमा पक्राउ परेका चारजनालाई रुसले सार्वजनिक गरेको छ । एकलाई ह्वीलचेयरमा र बाँकी तीनजनालाई हिँडाएर मस्को अदालतमा उपस्थित गराइएको हो । यी चारमाथि आतंकवादी कार्य गरेको अभियोग लगाइएको छ ।

क्रोकस सिटी हलमा शुक्रबार रातिको आक्रमण इस्लामिक स्टेट समूह (आईएस)ले गराएको भनिएको छ । तर, रुसी अधिकारीले यसमा युक्रेनको संलग्नता हुन सक्ने आशंका गरेका छन् ।

अभियुक्त चारजनाको नाम दलर्दजोन मिर्जोयेभ, सैदाक्रामी मुरोदली रचाबालिजोडा, शम्सिदिन फरिदुनी र मुहम्मदसोबिर फयजोभ भनिएको छ । सोधपुछका क्रममा चारैजना घाइते देखिन्छ । उनीहरूले आपराधिक कार्य गरेको मस्कोस्थित बास्मान्नी जिल्ला अदालतमा स्वीकार गरेका छन् ।

चारैजना ताजिकिस्तानका नागरिक भएको रुसी समाचार एजेन्सी तासले जनाएको छ । उनीहरूलाई सुनुवाइपूर्व आउँदो मे २२ सम्म हिरासतमा राखिनेछ ।

चार बन्दुकधारीले उत्तरी मस्कोको क्रास्नोगोर्स्कस्थित क्रोकस सिटी हलमा आक्रमण गरेका थिए । उनीहरूले कन्सर्टमा सहभागी करिब ६ हजार मानिसमाथि अन्धाधुन्ध गोली प्रहार गरेका थिए । घटनामा १०० भन्दा बढी मानिस घाइते छन् । बीबीसीबाट ।