काठमाडौं । उपप्रधान एवं भौतिक पूर्वाधार तथा यातायातमन्त्री रघुवीर महासेठले गृहमन्त्री रवि लामिछानेविरुद्ध लागेको आरोपमाथि छानबिन जारी रहेको बताएका छन् ।

बिहीबार जनकपुर विमानस्थलमा सञ्चारकर्मीहरूसँग कुरा गर्दै उनले छानिबनमा दोषी देखिए सरकारबाट बाहिर जानुपर्ने बताए । दोषी जो कोही भए पनि कारबाहीको दायरामा आउने उनको भनाइ छ । 

उनले गृहमन्त्री लामिछानेलाई नेपाली कांग्रेसले प्रधानमन्त्री 'अफर' गर्दा नमानेर अहिलेको सत्ता गठबन्धनमा आएकाले विरोध गरिरहेको बताए । प्रधानमन्त्रीको अफर गर्दा ठिक र गृहमन्त्री बन्दा अपराधी भन्नु गलत रहेको बताए ।

उनले भने, "जहाँ हाम्रो उपप्रधानमन्त्री रवि लामिछानेजीको कुरा छ । त्यो कुरा अहिले जुन प्रकारले कांग्रेसले राजीनामाको माग गर्नुभएको छ । त्यो आफैँमा गलत कुरा हो । उहाँहरूको माग संसदीय छानबिन समिति हो । हिजो गठबन्धन परिवर्तन हुँदा उहाँलाई नेपाली कांग्रेसले प्रधानमन्त्री बनाउन सक्ने तर उहाँहरूको अफर स्वीकार नगर्दा र यो सरकारमा आएर गृहमन्त्री बन्दा अपराधी हुने, ठग हुनेकुरा गलत हो । त्यसैले छानबिन जारी छ । जो पनि दोषी भए भने त सरकारबाट बाहिर जानैपर्छ ।"

उपप्रधानमन्त्री महासेठले वर्तमान सत्ता गठबन्धन पूरा कार्यकाल चल्ने बताए ।