काठमाडौं । चलचित्र ‘बोक्सीको घर’को गीत ‘जिन्दगीको कथा, यता न उता’ सार्वजनिक भएको छ । गीतमा स्वीअरिती र निहारिकाको स्वर रहेको छ । मोनिस निरौलाको संगीत र सुलक्षण भारतीको शब्द छ ।
अभिनेत्री केकी अधिकारीको निर्माण र अभिनय रहेको चलचित्र वैशाख १४ गते रिलिज हुँदै छ । भिडियोमा अभिनेत्री केकी र निर्देशक तथा अभिनेता सुलक्षण भारती फिचर्ड छन् ।
भिडियोमा उनीहरूको विवाह र त्यसपछिको परिस्थिति चित्रण गरिएको छ । गीतको भाव अनुसार दृश्य छैन । निर्माण पक्षले यसलाई सस्पेन्स राखेको छ ।
आठ वर्षअघि मञ्चन भएको नाटक ‘बोक्सीको घर’माथि रहेर अभिनेत्री केकीले यो फिल्म निर्माण गरेकी हुन् । उनले सामाजिक थ्रिलर जनरामा निर्माण भएको फिल्मले समाजमा प्रचलित कुप्रथालाई चित्रण गर्ने बताएकी छन् ।
महिलालाई ‘बोक्सी’को आरोप लगाएर समाजले उनीहरूमाथि गर्ने शोषणको वरिपरि रहेर चलचित्र निर्माण भएको छ ।
केकीसँगै सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोलालगायतको अभिनय छ ।
