काठमाडौं । नेपाली कांग्रेसका सांसद एवम् पूर्वअर्थमन्त्री डा. प्रकाशशरण महतले गठबन्धनका नेताले जनता भुलाउने काम गरेको बताएका छन् ।
बुधबारको प्रतिनिधिसभा बैठकमा विनियोजन विधेयकका प्राथमिकता र सिद्धान्तमाथिको छलफलमा बोल्दै उनले यस्तो बताएका हुन् । “फाइदा लिइरहेकाहरूले अफ्ठ्यारो पार्लान् । हामीले फाइदा पाइरहेका थियौँ यो आएर सबै रोकिदियो भनेर सबै पावर सेन्टरमा पुुग्छन् । प्रधानमन्त्री कहाँ पुग्छन्, गठनबन्धनको नेता कहाँ पुग्छन्, उनले भने, “कतिलाई उत्तर दिनु ?”
प्रधानमन्त्रीदेखि जिम्मेवार नेताहरूले पनि सत्यतथ्य नबुझी उल्टै मन्त्रीमाथि नै दबाब दिने गरेको उनले गुनासो गरे । “लौ यस्तो गर्नु भएछ, के गर्नु भयो तपाईं छ । बर्बादै गर्नु भयो कि क्या हो ? सबै आएर बसी खान नदिने भए,” उनले भने ।
उनले नेताको ध्यान जनतामुखी हुनुपर्ने बताए । साथै सोहीअनुसार आफूले आगामी वर्षको बजेटको सिद्धान्त र प्राथमिकता’ ल्याएको दाबी गरे । “अब हामीले खुसी पार्ने आमजनतालाई हो । सोही अनुसार बजेट ल्याउनुपर्छ । उनीहरूलाई खुसी पार्दा दलहरूले धेरै मत प्राप्त गर्ने होला नी । आफू नजिकका लागि खुसी पारेर जनमत बढ्ने हैन होला ?, उनले भने, “त्यसकारण यो प्राथमिकताको विषय आएका छन् । त्यो अन्तत महत्त्वपूर्ण छ ।”
