काठमाडौं । नेकपा एमालेले पार्टीको ११औँ महाधिवेशनसम्ममा १० लाख सक्रिय सदस्य बनाउने लक्ष्य लिएको छ । महासचिव शंकर पोखरेलले जारी गरेको सदस्यता नवीकरणसम्बन्धी निर्देशनमा प्रत्येक वडामा मतदाता संख्याको न्यूनतम तीन प्रतिशत र जिल्लामा ६ प्रतिशत सदस्य पुर्‍याउने गरी कार्ययोजना बनाउनुपर्ने उल्लेख छ ।

“पार्टी केन्द्रको निर्देशन कार्यान्वयन गर्न पार्टी सदस्य संख्या प्रत्येक वडामा मतदाता संख्याको न्यूनतम तीन प्रतिशत र जिल्लामा ६ प्रतिशत पुर्‍याउने गरी जिल्ला, पालिका र वडा कमिटीले कार्ययोजना बनाउनुपर्छ,” महासचिव पोखरेलले निर्देशनमा भनेका छन्, “ठोस जिम्मेवारी दिएर कार्यकर्ता परिचालन गर्नुपर्छ । ११औँ महाधिवेशनसम्ममा सक्रिय सदस्य संख्या नै १० लाख पुर्‍याउनुपर्नेछ ।” 

प्रत्येक गाउँपालिकाले एक वर्षमा कम्तीमा ५० जना, नगरपालिकाले १०० जना, उपमहानगरले १५० जना र महानगरपालिकाले २०० जना ४० वर्ष मुनिका युवाहरूलाई पहिचान गरी नेतृत्व विकासको प्रशिक्षणसहित पार्टीमा आवद्ध गराउनुपर्ने निर्देशनमा उल्लेख छ । एमालेको १०औँ महाधिवेशन २०७८ सालमा भएको थियो । गत असोजसम्ममा सदस्यता साढे पाँच लाख जनाले नवीकरण गरेका छन् । 

महासचिव पोखरेलका अनुसार पार्टीका सदस्यहरूको नवीकरण चैत महिनाभित्र सम्पन्न गर्नुपर्छ । ०८१ वैशाख पहिलो हप्तामा नवीकरण रिर्पोटसहितका जिल्ला कमिटीका बैठकहरू राख्ने, अभिलेखीकरण तथा प्रमाणीकरणका लागि सदस्यहरूको नवीकृत सूची र आर्थिक दायित्व प्रदेश कार्यालयमार्फत् वैशाख १५ गतेभित्र केन्द्रीय संगठन विभागमा पठाइसक्न महासचिव पोखरेलको निर्देशन छ । सदस्यता नवीकरण गर्दा कसैले अन्य सदस्यहरूको एकमुष्ट शुल्क (लेबी) तिरिदिने काम गरे कारबाही गरिने चेतावनी समेत दिइएको छ । 

“सदस्यता नवीकरणका क्रममा कसैले अन्य सदस्यहरूको एकमुष्ट शुल्क (लेबी) तिरिदिने, सदस्यहरूको सूचीमा हेरफेर गर्ने लगायतका अनुचित तरिका अपनाएको पाइएमा त्यो कारबाहीको विषय बन्नेछ,” निर्देशनमा भनिएको छ । त्यस्तै, पार्टी कार्यालय बनाउनका लागि प्रत्येक सदस्यबाट १०० रुपैयाँ उठाउने पार्टीको निर्णय पनि उल्लेख गरिएको छ ।