बेइजिङ । टिकटकलाई लक्षित गर्दै अमेरिकाले बुधबार विधेयक अगाडि बढाएपछि चीनले बिहीबार अरू देशका कम्पनीमाथि अनुचित दमन रोक्न आह्वान गरेको छ ।

अमेरिकाले बजार अर्थतन्त्र र निष्पक्ष प्रतिस्पर्धाको सिद्धान्तलाई इमानदारीपूर्वक सम्मान गर्नुपर्ने र सबै देशका उद्यमलाई खुला, निष्पक्ष, न्यायपूर्ण र भेदभावरहित तरिकाले विकसित हुने वातावरण उपलब्ध गराउनुपर्ने चीनका वाणिज्य मन्त्रालयका प्रवक्ता हे यादोङले बताए ।

“सम्बन्धित पक्षले चिनियाँ कानुन र नियमहरूको कडाइका साथ पालना गर्नुपर्ने र चीनले आफ्नो वैध अधिकार र हितको दृढतापूर्वक रक्षा गर्न आवश्यक सबै उपाय अवलम्बन गर्ने,” उनले पत्रकार सम्मेलनमा भने ।

यसै हप्ता यूएस हाउस अफ रिप्रिजेन्टेटिभ्सले टिकटकसम्बन्धी बिललाई अनुमोदन गरेको छ, जसमा टिकटकलाई या त यसले मूल कम्पनी, चिनियाँ टेक विशाल बाइटडान्सबाट अलग हुनुपर्ने वा राष्ट्रव्यापी प्रतिबन्धको सामना गर्नुपर्ने जनाइएको थियो । रासस/सिन्ह्वा