काठमाडौं । राष्ट्रियसभा सदस्य राजेन्द्रलक्ष्मी गैरेले नर्सिङ र मेडिकल कलेजलाई शिक्षण अनुमति नदिएर त्रुटि गरिएको बताएकी छन् । आइतबार राष्ट्रियसभा बैठकमा आउँदो आर्थिक वर्ष २०८१/८२ का निम्ति विनियोजन विधेयकका सिद्धान्त र प्राथमिकतामाथिको छलफलका क्रममा उनले यस्तो बताएकी हुन् ।

नेपालमा नर्सिङ पढ्न नपाएपछि विद्यार्थी विदेशिन बाध्य भएका उनले उल्लेख गरिन् । नेपालमा पढ्न नपाउँदा विद्यार्थीले विदेशमा दुःखसाथ पढ्नुपरेको भन्दै उनले यसबारेमा सरकारले सोच्नुपर्नेमा जोड दिइन् ।

“आज युवाहरू शिक्षाको नाममा दिन प्रतिदिन बहिर्गमन भइरहेका छन् । हिजो हामीले केही त्रुटि गर्‍यौँ भन्ने मलाई लाग्दछ,” उनले भनिन्, “हामीले नर्सिङ कलेज, मेडिकल कलेजहरूलाई शिक्षणका लागि अनुमति नदिने, त्यसलाई साँघुरो बनाउँदाखेरि आज हाम्रो भाइबहिनीहरू भारतको बोर्डरहरूमा, बंगलादेश र युरोपियन देशहरूमा गएका छन् । धेरै दुःख पाएका छन् । त्यसकारणले अबको सरकारले सोच्नुपर्दछ ।” न्युज एजेन्सी नेपाल