काठमाडौं । नेपाली सेना दिवसका अवसरमा सैनिक मञ्च टुँडिखेलमा शुक्रबार विशेष समारोहका बीच युद्धकला, शिवरात्रि परेड, तोपबढाइँ, कवाज र आतसबाजी प्रदर्शन गरिएको छ । सेनाले शुक्रबार मुलुकभर विविध कार्यक्रम गरी २६१औँ स्थापना दिवस मनाएको हो ।

सो अवसरमा राष्ट्रपति रामचन्द पौडेल, उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल ‘प्रचण्ड’सहित सरकारका मन्त्री र उच्चपदस्थ व्यक्तिहरूको उपस्थिति थियो ।

सेनाले विशेष कला प्रदर्शनी समेत गरेको थियो । राष्ट्रपति पौडेलले सो अवसरमा सैनिक मञ्चस्थित सैनिक स्मारकमा पुष्पहार अर्पण गरे ।

हेलिकोप्टरबाट राष्ट्रिय झन्डासहित सेना दिवसको ब्यानर प्रदर्शनी र पुष्पवृष्टि गरिएको थियो । परेड (शस्त्राभ्यास) तथा तोपबढाइँ, कवाजलगायत विविध सैनिक कला र सांस्कृतिक कार्यक्रम गरियो ।

जङ्गीअड्डा मातहत मुलुकका विभिन्न भागमा तैनाथ पृतना, बाहिनी, गण, गुल्मलगायत निकायमा यो दिवसका अवसरमा विभिन्न कार्यक्रम आयोजना गरिएको छ ।

नेपाली सेनाले महाशिवरात्रिको दिनलाई सेना दिवसका रूपमा मनाउँदै आएको छ । संयुक्त राष्ट्रसंघीय शान्ति स्थापना कार्यमा नेपाली सेना सन् १९५८ देखि संलग्न छ । शान्ति स्थापनाका निम्ति सेना खटाउने मुलुकको सूचीमा नेपाल अग्रणी स्थानमा पर्छ । –न्युज एजेन्सी नेपाल