काठमाडौं । देशका केही भू–भागमा आज हिमपातको सम्भावना रहेको छ । उच्च पहाडी र हिमाली क्षेत्रमा हिमपातको सम्भावना छ ।  

जल तथा मौसम विज्ञान विभागका अनुसार बिहान पहाडी भू–भागमा आंशिक बदली रहेको छ । बाँकी भू–भागको मौसम मुख्यतया सफा रहेको छ ।

विभागका अनुसार दिउँसो पहाडी भू–भागमा आंशिक बदली रहनेछ । बाँकी भू–भागमा मौसम मुख्यतया सफा रहनेछ । कोसी, वाग्मती र गण्डकी प्रदेशको उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ ।

विभागले राति देशको पहाडी भू–भागमा आंशिक बदली रहने जनाएको छ । बाँकी भू–भागमा मौसम मुख्यतया सफा रहनेछ । 

कोसी र गण्डकी प्रदेशको उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना रहेको विभागले जनाएको छ ।

“आज कुनै पनि प्रदेशमा पानी पर्ने सम्भावना छैन । अझै तीनचार दिनसम्म वर्षाको सम्भावना छैन,” मौसमविद् सञ्जिव अधिकारी बाह्रखरीसँग भन्छन्, “केही दिन मौसम सुक्खा नै रहनेछ ।” 

आज शिवरात्रि पर्व, आजको दिन वर्षा हुन्छ भन्ने जनविश्वास छ । यसमा सत्यता छ भन्ने प्रश्नमा मौसमविद् अधिकारी भन्छन्, “शिवरात्रिको दिन पानी पर्छ नै भन्ने हुँदैन । यो जनविश्वास मात्रै हो । यो कुनै अध्ययनले पुष्टि गरेको कुरा होइन ।” 

शिवरात्रिको दिन पानी पर्नु संयोग मात्रै भएको उनी बताउँछन् । “शिवरात्रिको दिन पानी पर्‍यो भने त्यो कोइन्सिडेन्स मात्रै हो । कतिपय वर्षमा यो दिन पानी परेकाले शिवरात्रिका दिन पानी पर्छ भन्ने भनाइ चल्दै आएको होला । कुनै अध्ययनले यस कारण यो दिन पानी पर्छ भनेर देखाएको छैन,” मौसमविद् अधिकारी भन्छन्, “कतिपय वर्ष आजका दिनमा वर्षा भएको छ । तर त्यो संयोग मात्रै हो । पछिल्ला केही वर्षहरूको नै अध्ययन गर्ने हो भने शिवरात्रिका दिन वर्षा भएको छैन । त्यसैले यसमा कुनै वैज्ञानिक कारण छैन । आज काठमाडौं सुक्खा हुने देखिन्छ ।”