काठमाडौं । राष्ट्रियसभा सदस्य देवेन्द्र दाहालले राष्ट्रियसभालाई 'वृद्धहरूको सभा' भन्ने भाष्यलाई कानुन निर्माण र कामले गलत सावित गर्नुपर्ने बताएका छन् । बिहीबार राष्ट्रियसभाको बैठकमा उनले यस पटकको सभामा केही नाम चलेका सदस्यहरू पनि आएको भन्दै सभाको गरिमा झनै थपिएको अनुभूति भएको बताए ।

उनले राष्ट्रियसभा विधायकी अभ्यासमा 'चेक एन्ड ब्यालेन्स'का लागि पनि महत्त्वपूर्ण भूमिका निर्वाह गर्ने थलो भएको बताए । प्रतिनिधिसभाबाट आएका विधेयकहरू कानुन निर्माणको सन्दर्भमा आएका विधेयकहरू छलफल गर्ने सन्दर्भमा केही समस्या भए राष्ट्रियसभाले सच्याउनुपर्ने उनको भनाइ छ ।

"यसपटक यस सभामा मैले चिनेका, नाम सुनेका, चलेका मान्यज्यूहरू पनि आउनुभएको छ । त्यसैले गर्दा यसबाट यो सभाको गरिमा माथि उठेको छ भन्ने लागेको छ । यो सभालाई पटक पटक बुढापाकाहरू थन्क्याउने सभा भयो भन्ने चर्चा पनि चलेको छ । त्यसलाई यो सभामा खेलेको भूमिकाबाट त्यो कुरालाई हामीले खण्डित गर्न सक्नुपर्छ," दाहालले भने ।