काठमाडौं । त्रिदेशीय ट्वान्टी–२० शृंखलाको उपाधिका लागि आज नेपाल र नेदरल्यान्ड्सबीच खेल हुँदै छ । कीर्तिपुरस्थित त्रिवि क्रिकेट मैदानमा हुने फाइनल बिहान ११ः३० बजे सुरु हुनेछ ।

यसअघि आइतबार वर्षाका कारण नामिबियासँगको खेल बिनानतिजा टुंगिएपछि त्रिदेशीय ट्वान्टी–२० शृंखलाको उपाधिका निम्ति नेदरल्यान्ड्सले नेपालसँग खेल्ने भएको हो ।

आजको खेल भने वर्षाले प्रभावित हुने सम्भावना नरहेको जल तथा मौसम विज्ञान विभागले जनाएको छ । पश्चिमी न्यून चापीय प्रणालीको आंशिक प्रभाव रहे पनि आज काठमाडौंमा वर्षाको सम्भावना नरहेको विभागको भनाइ छ ।

“आज काठमाडौं उपत्यकामा वर्षाको सम्भावना छैन । काठमाडौंमा अपराह्नपछि बदली हुनेछ । तर वर्षाको सम्भावना छैन,” मौसमविद् गोविन्द झा बाह्रखरीसँग भन्छन्, “बदली भए पनि वर्षा हुँदैन । सामान्य बदली मात्रै हुनेछ । आज हिजो (सोमबार)को जति पनि बदली हुँदैन ।”

काठमाडौंमा आज हुने कुनै गतिविधिलाई वर्षा र मौसमले प्रभाव नपार्ने उनी स्पष्ट पार्छन् । “आज काठमाडौंमा हुने क्रिकेट गेमलाई मौसमले प्रभाव पार्दैन,” उनले भने, “पानी पर्दैन । घाम लाग्छ । सोमबारको भन्दा तापक्रम केही बढ्छ ।”

आज दिउँसो गण्डकी, लुम्बिनी, कर्णाली र सुदूरपश्चिम प्रदेश लगायत देशका पहाडी भू–भागमा आंशिक बदली रही बाँकी भू–भागमा मौसम सफा रहनेछ ।