काठमाडौं । सशस्त्र प्रहरीले नवलपरासीको सुस्ता गाउँपालिका–१ बरुवमा रहेको एक गोदाममा छापा मारेर ठूलो मात्रामा चिनी र केराउ बरामद गरेको छ । सोमबार साँझ दुई हजार बोरा चिनी र केराउ बरामद गरिएको सशस्त्र प्रहरीले जनाएको छ ।

भारतबाट अवैधरूपमा ल्याइएको सूचनाको आधारमा सशस्त्र प्रहरी बल नेपाल नम्बर २६ गण पश्चिम नवलपरासिबाट सशस्त्र प्रहरी उपरीक्षक प्रकाश वाग्लेको कमान्डमा गएको ६० जना भन्दा बढीको फौजले गोदाममा छापा मारेको हो ।

सशस्त्र प्रहरीका अनुसार २०० बोरा चिनी र एक हजार ७०० बोरा भन्दा बढी केराउ फेला परेको छ । स्थानीय ज्ञानु अर्यालको घर पछाडि करिब ५० फिट लम्बाइ र ३० फिट चौडाइको टिनको गोदाममा लुकाइराखेको अवस्थामा चिनी र केराउ बरामद भएको सशस्त्र प्रहरीले जनाएको छ ।

अर्यालले गोदाम भाडामा लगाएको भने पनि भाडामा लिने व्यक्तिको पहिचान हुन नसकेको सशस्त्र प्रहरीले जनाएको छ ।

ती खाध्य सामग्री ३० र ५० किलोको बोरामा रहेको छ । बोरा ओसार्नका लागि १० वटा भन्दा बढी ट्रक प्रयोग गरिएको छ ।

करिब ४५ लाख मूल्यभन्दा बढीको अनुमान गरिएको चिनी र केराउ आवश्यक कारबाहीका लागि महेशपुर भन्सार कार्यालय नवलपरासी बुझाइएको छ ।