काठमाडौं । नेकपा (एमाले)का अध्यक्ष केपी शर्मा ओलीले वर्तमान सरकारले शक्ति पृथकीकरणको सिद्धान्त बुझ्न नसकेको बताएका छन् । आइतबार संघीय संसद् भवनमा पार्टीका सांसदहरूलाई प्रशिक्षण दिँदै उनले यस्तो बताएका हुन् ।

उनले वर्तमान सरकार अलोकतान्त्रिक र शक्ति पृथकीकरणको सिद्धान्त नबुझेको जिकिर गरे । अर्थमन्त्री डा. प्रकाशशरण महतमा अर्थमन्त्रीले नियम कानुन, मर्यादा, प्रचलन मान्नै नपर्ने भन्ने घमण्ड देखिएको उनले बताए ।

देशको अर्थतन्त्र ओरालो लगाएको र अर्थमन्त्रीले ०४८ सालमै असफल भइसकेका सिद्धान्त दोहोर्‍याउन खोजेको उनको भनाइ छ ।

“यस्तो बेहालको अलोकतान्त्रिक र शक्ति पृथकीकरणको वास्तवमा सिद्धान्तै नबुझेको । यसस्तरको सरकार, यसस्तरको अर्थमन्त्री र अर्थमन्त्रीलाई के लागेको छ भने अर्थमन्त्री यस्तो डिक्टेटर हो, जसले नियम, कानुन, मर्यादा, प्रचलन आदि केही हेर्नु पर्दैन भन्ने लागेको छ,” उनले भने, “त्यो देखिन्छ । न अर्थमन्त्री कसैसँग परामर्श गर्नुहुन्छ न केही गर्नुहुन्छ । सुनेको, अर्थशास्त्रमा पीएचडी गर्नुभएको भन्ने, कुन अर्थशास्त्रमा कहाँबाट पीएचडी गर्नुभएछ ? अचम्म लाग्छ ।”

उनले थपे, “देश ओरालो लगाउने, असफल भएका थोत्रा सिद्धान्त बोकेर, ०४८, ०५० सालमै असफल भइसकेको सिद्धान्तहरू फेरि दोहोर्‍याउन खोजिएको छ । यो सरकार बन्नु नै नहुने सरकार थियो ।”

उनले आइपरे एमाले सत्तामा जाने पनि बताए । न्युज एजेन्सी नेपाल