काठमाडौं । फिफा विश्वकप–२०२६ छनोटको दोस्रो चरणको खेलका लागि बहराइनले नेपालमा नखेल्ने भएको छ । दोस्रो चरणको खेल आयोजना हुने तय भएकको दशरथ रंगशालाको स्थिति नाजुक रहेकाले बहराइनले नेपाल भ्रमण नगर्ने भएको हो ।

शुक्रबार अखिल नेपाल फुटबल संघ (एन्फा) ले एक विज्ञप्ति जारी गर्दै विश्वकप छनोटअन्तर्गत दोस्रो चरणको 'होम गेम' नेपालमा नहुने पुष्टि गरेको छ ।

“अन्य धेरै खेलकुद र अन्य गतिविधि कारण र मैदानलाई ठिक बनाउन लाग्ने समयका आधारमा नेपालको एकमात्र अन्तर्राष्ट्रिय रंगशाला विश्वकप छनोटको खेल आयोजनाका लागि असन्तोषजनक रहेको छ । एएफसीले जानकारी गराएको यो निर्णय फेब्रुअरीमा भएको एएफसी प्रतिनिधिको मैदान अवलोकनपछि भएको हो,” एन्फाले जारी गरेको विज्ञप्तिमा उल्लेख छ ।

घरेलु मैदान विश्वकप छनोट खेल्नलायक नभएपछि एन्फाले ‘तटस्थ’ देश र मैदानबारे चाँडै नै जानकारी गराउने बताएको छ ।

नेपालले मार्च २१ मा घरेलु मैदानमा बहराइनसँग 'होम गेम' खेल्ने तालिका थियो । यसपछि नेपालले मार्च २७ मा अवे खेलका लागि बहराइनको भ्रमण गर्ने तालिका छ ।

समूह ‘एच’मा रहेको नेपालले यसअघिका दुवै खेल हारिसकेको छ । नेपालले यसअघि युनाइटेड अरब इमिरेट्स (यूएई) र यमनसँग हार बेहोरेको थियो ।