काठमाडौं । एप्पलले ‘ड्राइभरलेस’ विद्युतीय कार बनाउने लामो समयदेखि चर्चामा रहेको ‘प्रोजेक्ट टाइटन’ अन्त्य गरेको छ । कम्पनीले मंगलबार आन्तरिक रूपमा दसौँ अर्ब अमेरिकी डलर खर्च गरेको योजना अन्त्य गर्ने निर्णयको जानकारी गराएको हो ।

अरु कार निर्माताहरूलाई टक्कर दिने किसिमले गोप्य रूपमा रहेको यो योजनामा काम गरिरहेका करिब दुई हजार कर्मचारीलाई एप्पलले जेनेरेटिभ एआईमा सार्ने भएको छ ।

एप्पलका प्रमुख अपरेटिङ अफिसर जेफ विलियम्स र योजनाका उपाध्यक्ष केभिन लिन्चले परियोजना बन्द भएको कर्मचारीलाई बताएका हुन् । कम्पनीले यसमा काम गरिरहेका कर्मचारीलाई हटाउने तयारी पनि गरेको छ ।

सन् २०१७ मा एप्पलका सीईओ टिम कुकले चालकविहीन कारमा कम्पनीले काम गरिरहेको भनेका थिए । पहिलोपटक प्रोजेक्ट टाइटन सुरु गरेको एक दशकपछि एप्पल फेरि पूरानै अवस्थामा फर्केको हो ।

एप्पलले यस वर्ष जेनेरेटिभ एआईका क्षेत्रमा नयाँ उचाई हात पार्ने सीईओ कुकले भनेका छन् । कार उत्पादन गर्ने योजना अन्त्य गर्दै एप्पल जेनेरेटिभ एआईका क्षेत्र केन्द्रित भएको छ ।