काठमाडौं । जान निकोल लोफ्टी–इटोलने कीर्तिमानी शतकप्रेरित नामिबियाले त्रिदेशीय ट्वान्टी–२० शृंखलाको पहिलो खेलमा नेपालविरुद्ध २० रनको जित निकालेको छ ।

मंगलबार कीर्तिपुरस्थित त्रिवि क्रिकेट मैदानमा सम्पन्न खेलमा नामिबियाले दिएको २०७ रनको लक्ष्य पछ्याउने क्रममा नेपालले १८.५ ओभरमा सबै विकेट गुमाएर १८६ रनमात्र जोड्न सक्यो ।

नेपाललाई जितका लागि अन्तिम दुई ओभरमा २४ रन आवश्यक थियो । नेपाल १८३–८ को स्थितिमा हुँदा नामिबियाका कप्तान जेजे स्मिथले १९औँ ओभर बलिङका लागि रुबेल ट्रम्पेलमेनलाई बल थमाएका थिए । ट्रम्पेलमको पहिलो तीन बलमा नेपाली ब्याटरले समान एक रन जोडेका थिए । तर, ट्रम्पेलमनले चौथो र पाँचौँ बलमा लगातार विकेट लिएपछि नेपाल २० रनले निराश बनेको हो । 

ट्रम्पेलमनले चौथो बलमा दीपेन्द्रसिंह ऐरीलाई र पाँचौँ बलमा अविनाश बोहरालाई पभेलियनको दिशा देखाएका थिए । नेपालका दीपेन्द्रसिंह ऐरीले सर्वाधिक ४८ रन बनाए । दीपेन्द्रले ३२ बलमा दुई चौका र दुई छक्का प्रहार गरे । कप्तान रोहितकुमार पौडेलले ४२ रन बनाए । २४औँ बलमा लोफ्टी–इटोनको ओभरमा जान फ्राइलिन्कबाट क्याच हुनुअघि रोहितले समान तीन चौका र तीन छक्का प्रहार गरे ।

२०–२ को अवस्थाबाट रोहितले कुशल मल्लसँग तेस्रो विकेटका लागि ५७ रनको साझेदारी गर्दै नेपालको इनिङ सम्हालेका थिए । कुशलले २१ बलमा चार चौका र एक छक्कासहित ३२ रन प्रहार गरे । सोमपाल कामले ११ बलमा एक चौका र तीन छक्कासहित २६ रन थपे । गुल्सन झाले ६ बलमा समान एक चौका र छक्कासहित १२ रन जोड्दा अन्य ब्याटरले भने दोहोरो अंकमा रन बनाउन सकेनन् ।

नेपालका ओपनर कुशल भुर्तेल र अन्तिममा ब्याटिङका लागि आएका अविनाश ‘गोल्डेन डक’ भएका थिए । अर्का ओपनर आसिफ सेख र विवेक यादवले समान ६ रन बनाए । सन्दीप जोराले पाँच रन थप्दा करण केसी दुई रनमा अविजित रहे । 

नामिबियाका रुबेन ट्रम्पेलमेनले चार विकेट लिए । ३.५ ओभर बलिङ गरेका उनले २९ रन खर्चिए । बर्नार्ड स्कल्ज, जान फाइलिन्क र जान निकोल लोफ्टी इटोनले समान दुई विकेट लिए । त्यसअघि जान निकाले लोफ्टी–इटोन विस्फोटक रूपमा प्रस्तुत भएपछि टस जितेर ब्याटिङमा आएको नामिबियाले निर्धारित २० ओभरमा चार विकेट गुमाएर २०६ रनको योगफल खडा गरेको थियो । 

नामिबियाबाट विस्फोटक ब्याटिङ गरेका इटोनले १०१ रनको सानदार इनिङ खेले । ट्वान्टी–२० अन्तर्राष्ट्रिय क्रिकेटमा सबैभन्दा छिटो शतक बनाउने ब्याटर बनेका इटोनले ३६ बलमा ११ चौका र आठ छक्का प्रहार गरे । ३३ बलमा शतक बनाउँदै यो सबैभन्दा छिटो १०० रन बनाउने ब्याटर बनेका इटोनले नेपालका कुशल मल्लका नाममा रहेको कीर्तिमान भंग गरेका हुन् । यसअघि एसियन गेम्समा मंगोलियाविरुद्ध ३४ बलमा शतक प्रहार गर्दै कुशल ट्वान्टी–२० अन्तर्राष्ट्रिय क्रिकेटमा सबैभन्दा छिटो शतक बनाउने ब्याटर बनेका थिए । 

ट्वान्टी–२० अन्तर्राष्ट्रिय क्रिकेटमा इटोनको यो पहिलो शतक हो । ६२–३ को अवस्थामा ब्याटिङका लागि आएका इटोनले चौथो विकेटका लागि मलान क्रुजरसँग १३५ रनको कीर्तिमानी साझेदारी गरे । ट्वान्टी–२० अन्तर्राष्ट्रिय क्रिकेटमा यो नै नामिबियाले बनाएको अहिलेसम्मकै उच्च साझेदारी हो ।

यसअघि सन् २०१९ मा सीजी विलियम्स र जेपी कोट्जेले बोत्सवानाविरुद्ध ११२ रनको साझेदारी गर्दै सबैभन्दा ठूलो साझेदारीको रेकर्ड कायम गरेका थिए । क्रुजरले ४८ बलमा ६ चौका र दुई छक्कासहित अविजित ५९ रन बनाए । ट्वान्टी–२० अन्तर्राष्ट्रिय क्रिकेटमा यो उनको पहिलो अर्धशतक हो ।

खेलको ११औँ समाप्त हुँदासम्म नामिबियाले तीन विकेट गुमाएर ६६ रन बनाएको थियो । तर, यसपछि इटोन र क्रुजरले आक्रामक साझेदारी गरेपछि नामिबियाले पछिल्लो नौ ओभरमा १४० रन बनाएको थियो । नामिबियाविरुद्ध नेपालका कप्तान रोहितले दुई विकेट लिए । चार ओभर बलिङ गरेका रोहितले ३० रन खर्चिए । यसबाहेक, करण र अविनाशले समान एक विकेट लिए । ट्वान्टी–२० विश्वकपको तयारी स्वरुप आयोजित शृंखलामा नेपाल, नामिबिया र नेदरल्यान्ड्स छन् । 

नेपालले अब फागुन १६ गते नेदरल्यान्ड्ससँग खेल्नेछ । यस्तै, नेपालले फागुन १८ गते पुनः नामिबिया र १९ गते नेदरल्यान्ड्ससँग खेल्नेछ । शृंखलाको लिग चरणबाट शीर्ष दुई टोली उपाधिका लागि फाइनलमा भिड्नेछन् । फाइनल खेल फागुन २२ गते हुनेछ ।