काठमाडौं । प्रमुख प्रतिपक्ष दल नेकपा (एमाले)का सांसदले आफूहरूले उठाएका विषयमा प्रधानमन्त्री पुष्पकमल दाहाल ‘प्रचण्ड’ले जवाफ दिनुपर्ने अडान कायम राखेका छन् ।

सोमबार प्रतिनिधिसभा बैठकको आकस्मिक समयमा एमाले सांसदले ‘सभामुखको रुलिङलाई सरकारले किन बेवास्ता गरेको ?’ भनी प्रश्न गरे । एमाले सांसद गोकुल बास्कोटाले विवादित मन्त्रीले कि त राजीनामा नभए प्रधानमन्त्रीले बर्खास्त गर्नुपर्ने माग गरे ।

“प्रधानमन्त्रीले आजै भन्नुपर्छ, विवादित मन्त्रीहरूको विषयमा राजीनामा गर्ने कि बर्खास्त गर्ने ? ती मन्त्री हटाइनुपर्छ । सधैँ प्रश्न उठाउने, सरकार नाजवाफ हुने ?,” उनले भने ।

प्रधानमन्त्रीलाई ‘सुप्रिमो’ भनिने भन्दै बास्कोटाले ‘कसको दबाबमा जवाफ नदिएको ?’ भनी प्रश्न गरे ।

“प्रधानमन्त्रीलाई प्रचलित भाषमा सुप्रिमो भन्छन्, को छ उहाँभन्दा माथि ? अरूले लगाएजस्तो कम्फरटेबल घोडा बनेको हो ?,” उनले प्रश्न गरे ।

‘प्रतिपक्षीलाई दोष लगाएर गठबन्धनको झन्डा हल्लाएर सुशासन आउँछ ?’ भनी उनले थप प्रश्न गरे ।