काठमाडौं । थापाथलीस्थित परोपकार प्रसूति तथा स्त्रीरोग अस्पतालबाट २६ दिनकी शिशु चोरी गर्ने २४ वर्षीया मनिषा भनिने मनकुमारी सिंहले बेहोसीमा शिशु चोरी गरेको बयान दिएकी छन् ।

प्रहरी वृत्त सिंहदरबारको थुनामा रहेकी मनिषाले अस्पताल पुगेपछि आफ्नो होस् गुमेको हुँदा बच्चा बोकेर हिँडेको बयान दिएकी हुन् । प्रहरीसँग सोधपुछका क्रममा उनले भेनेकी छिन्, “अर्काको बच्चा बोकेर कसरी घर पुगेँ । किन गएँ, केही थाहा नै छैन ? मैले बेहोसीमा पुगेर यस्तो गरेँ ।”

बच्चा चोरी भएको १२ घण्टापछि उनलाई पक्राउ गर्न प्रहरी सफल भएको थियो ।  मनिषाले काभ्रेपलाञ्चोक चौरीदेउराली गाउँपलिका–३ घर भई कपन बस्दै आएकी २२ वर्षीया सबिना श्रेष्ठकी शिशुलाई शुक्रबार चोरी गरेकी थिइन् ।

त्यही राति काठमाडौं प्रहरीको विशेष टोली र उपत्यका अपराध अनुसन्धान कार्यालयको टोलीले काँडाघारीबाट शिशुलाई उद्धार गरेको थियो भने उनलाई पक्राउ गरेको हो । उनको खोजीका लागि प्रहरीले लगातार ८ घण्टा लामो अपरेसन चलाएको थियो । 

अस्पतालदेखि मनिषा बस्दै आएकी काँडाघारीसम्मका सीसी क्यामेराका फुटेज अध्ययनपछि शिशुको उद्धार गर्न सफल भएको जानकारी काठमाडौं प्रहरी प्रमुख एसएसपी भुपेन्द्र खत्री दिए । प्रहरी पुग्दा मनिषा सुत्केरीको बाहना बनाएर घरमा बसेकी थिइन् । उनीबाहेक कोठामा उनका श्रीमान् २८ वर्षीय नरेन्द्र मल्ल र उनकी दिदी शारदा शाहीसमेत थिए ।

प्रहरीले उनीहरूलाईसमेत नियन्त्रणमा लिएको थियो । तर, बच्चा चोरीको घटनामा उनीहरूको संलग्नता नदेखिएपछि प्रहरीले नरेन्द्र र शारदालाई शनिबार साँझ छाडिसकेको छ । शनिबार रक्तश्राव भएको बताएपछि प्रहरीले जाँच गर्न सिनामंगल अस्पताल पुर्‍याएको थियो । अस्पतालबाट साँझ नै पुनः थुनामा राखेको छ ।

पीडितले अपहरण तथा शरीर बन्धक मुद्दामा उजुरी दिएपछि मनिषाविरूद्ध आइतबारदेखि अनुसन्धान थालेको छ ।

श्रीमान् अस्पतालमै छोडेर घर पुगिन् मनिषा

प्रहरीको अनुसन्धानका क्रममा थापाथलीस्थित परोपकार प्रसूति तथा स्त्रीरोग अस्पताल चेकअपका लागि आउँदा मनिषा र उनका श्रीमान् नरेन्द्र सँगै आएका थिए । तर, मनिषाले अस्पतालको वार्डबाट आफ्नै श्रीमान्ले समेत नदेख्ने गरी उनले सबिनाको २६ दिनको शिशु बोकी भागेकी थिइन् ।

घर पुगेपछि बाटोमा बच्चा जन्माएको भन्दै श्रीमानलाई फोन गरेकी थिइन् । श्रीमान्बाहेक अन्य नातेदारलाई समेत आफूले बच्चा पाएको जानकारी गराएकी थिइन् । शुक्रबार प्रहरी नपुग्दासम्म मनिषाले बच्चा पाएको भन्दै शिशुको मुख हेर्न आफन्तहरूसमेत उनको कोठासम्म पुगेका थिए । मनिषाले दुई वर्षअघि मात्रै नरेन्द्र मल्लसँग प्रेम विवाह गरेकी थिइन् ।

नरेन्द्र नेपाली सेनामा कार्यरत छन् । विवाहलगत्तैबाट बच्चाको योजना बनाएका थिए ।  बच्चा नभएपछि मानसिक तनावमासमेत पुगेको आशंका गरिएको छ । नरेन्द्रले पनि श्रीमतीको व्यवहार अस्वाभाविक हुँदै गएको प्रहरीलाई बताएका छन् ।