काठमाडौं । नेकपा (एमाले)की सांसद सुनिता बरालले मानसिक समस्या बढ्दै गएको भन्दै सरकारको ध्यानाकर्षण गराएकी छन् । आइतबार प्रतिनिधिसभा बैठकमा उनले मानसिक रोगप्रति सरकारले विभिन्न रणनीतिक योजना बनाएर काम गर्न आवश्यक रहेको बताएकी हुन् ।
उनले आत्महत्याको समस्या पछिल्लो समय झनै बढेको भन्दै सरकारको ध्यानाकर्षण गराइन् । मानसिक समस्याका कारण समाजमा अपराध र आपराधिक घटना बढिरहेको उनले उल्लेख गरिन् । उनले मानसिक स्वास्थ्यमा सरकारले चासो नदिएको बताइन् ।
“केही दिनअघि ललितपुरमा एक महिलाले आफ्ना दुई बच्चाको हत्या गरी आत्महत्या गरिन् । त्यस्तै, काठमाडौंमा तीनजनाको हत्या गरी एक पुरुषले आत्महत्या गरे,” उनले भनिन्, “आत्महत्याको दर असाध्यै अत्यासलाग्दो तरिकाले बढिरहेको छ । डिप्रेसनका कारण बढेका अपराध र आपराधिक अवस्था डरलाग्दो अवस्था छ । यसतर्फ सरकारको ध्यान जान आवश्यक छ ।”
उनले सूचना, प्रविधि र डिजिटलाइजेसनका कारण सामाजिक समस्या बढिरहेको बताइन् । न्युज एजेन्सी नेपाल
