काठमाडौं । बाह्रखरीकर्मी एवं लेखक राजेश खनालको संस्मरणको सँगालो ‘घुरको धुँवा’ सार्वजनिक गरिएको छ । उक्त कृति प्रा. डा. वीरेन्द्रप्रसाद मिश्रलगायत व्यक्तिले लोकार्पण गरे ।

शनिबार बिहान काठमाडौंमा नेपाल स्रष्टा समाजद्वारा आयोजित कार्यक्रममा प्रा. डा. मिश्रले सँगालोमा समेटिएका संस्मरणले आफूलाई ७० वर्षअगाडिको अवधिमा पुर्‍याएको बताए । उनले भूतकाललाई वर्तमानसँग मात्र नभएर पुस्तकले तराई–मधेससँग जोड्ने काम पनि गरेको उल्लेख गरे ।

कार्यक्रमका अर्का वक्ता संविधानविद् प्रा. डा. विपिन अधिकारीले सार्वजनिक कृति सामाजिक जीवनको परिप्रेक्षमा लेखिएर ल्याइएको बताए । यो संस्मरणकृतिमा मधेसमा प्रयोग गरिने भाषा, संस्कृति, परिवेशलगायत विषयवस्तु प्रस्तुत गरिएको उनले उल्लेख गरे ।

समालोचक प्रा. डा. ज्ञानू पाण्डेले आफूले खनालका फुटकर संस्मरण पढेको चर्चा गरिन् । खनालले उठाएका सन्दर्भसँग आफू पनि जोडिन पुगेको उनले स्मरण गरिन् ।

कृतिकार राजेश खनालले साथीहरूको साथ र हौसलाले नै आफ्ना संस्मरण पुस्तकका रूपमा ल्याउन सकेको बताए ।

कार्यक्रममा बाह्रखरी मिडियाका प्रधानसम्पादक प्रतीक प्रधान, नारायण घिमिरे, श्रीओम श्रेष्ठ रोदन, चेतनाथ कँडेल हरित, देविका तिमिल्सिनाले पनि बोलेका थिए ।

कृति कर्मयोगी बद्रीविक्रम थापा स्मृति सेवा गुठीले प्रकाशनमा ल्याएको हो । बिक्री–वितरणको जिम्मा स्वदेश प्रकाशनले लिएको छ ।