काठमाडौं । विलासिताका वस्तुमा नेपालीको मोह पछिल्लो समय बढ्दै गएको देखिन्छ । विलासिताका वस्तुको आयात बढ्दा नेपालबाट अर्बौँ रुपैयाँ बाहिरिने गरेको छ ।

भन्सार विभागको तथ्यांकानुसार चालु आर्थिक वर्ष २०८०/८१ को पहिलो सात महिना (साउनदेखि माघसम्म)मा १७ अर्ब ३८ करोड ३६ लाख ९१ हजार रुपैयाँका स्मार्टफोन नेपाल भित्र्याइएको छ । उक्त मूल्यमा ११ लाख २६ हजार ७४७ थान स्मार्टफोन आयात गरिएको विभागले जनाएको छ ।

यो अवधिमा ६८ हजार ५३९ थान ल्यापटप तथा नोटबुक नेपाल भित्र्याएको छ । सोबापत चार अर्ब ४२ करोड २४ लाख २१ हजार रुपैयाँ बाहिरिएको छ ।

०८० साउनदेखि माघ मसान्तसम्म नेपालले विभिन्न देशबाट १४ अर्ब ६२ लाख ५६ हजार रुपैयाँको सुन आयात गरेको छ । उक्त मूल्यमा एक हजार ६७० केजी सुन भित्र्याइएको छ । यो अवधिमा २३ करोड ५४ लाख २२ हजार रुपैयाँको सुनका गहना विभिन्न देशबाट नेपाल आयात गरिएको छ ।

विभागका अनुसार पछिल्लो सात महिनामा नेपालले १५ अर्ब ४६ करोड ९१ लाख ११ हजार रुपैयाँभन्दा बढीका कार र जीप आयात गरेको छ । यो अवधिमा विद्युतीय जीप र कार मात्र नेपालमा १५ अर्ब रुपैयाँभन्दा बढीको भित्र्याइएको छ ।

चालु आर्थिक वर्षको पहिलो सात महिनामा नेपालले दुई अर्ब २६ करोड ९६ लाख एक हजार रुपैयाँको विभिन्न प्रकारका मदिरा आयात गरेको छ । यो अवधिमा २९ करोड ९३ लाख ९७ हजार रुपैयाँको वाइन, एक अर्ब ४९ करोड ९३ लाख तीन हजार रुपैयाँको ह्विस्की, एक करोड ५९ लाख ८४ हजार रुपैयाँको जिन र पाँच करोड दुई लाख ८२ हजार रुपैयाँको भोड्का नेपाल भित्र्याइएको छ ।

यो अवधिमा विभिन्न देशबाट ३६ करोड ५२ लाख ९० हजार रुपैयाँका सनग्लास र ६४ करोड ७ लाख ७९ हजार रुपैयाँको विभिन्न प्रकारका घडी नेपालले आयात गरेको भन्सार विभागको तथ्यांकले देखाउँछ ।

गएको साउनदेखि माघसम्म नेपालमा ४७ करोड ६९ लाख ३९ हजार रुपैयाँको विभिन्न प्रकारका क्यामेरा भित्र्याइएको छ । सो समयमा ६५ करोड चार लाख ५१ हजार रुपैयाँको विभिन्न आकारका टेलिभिजन सेट नेपालले आयात गरेको छ ।

नेपालले पछिल्लो सात महिनामा २२ करोड ४८ लाख २४ हजार रुपैयाँभन्दा बढीको विभिन्न प्रकारका वाद्ययन्त्र आयात गरेको छ । यो अवधिमा ३८ करोड ७३ लाख दुई हजार रुपैयाँका लाउडस्पिकर र ३९ करोड चार करोड ४५ लाख रुपैयाँको हेडफोन तथा इयरफोन नेपाल भित्र्याइएको छ ।

विभागका अनुसार नेपालले चालु आर्थिक वर्षको पहिलो सात महिनामा ८२ करोड १५ लाख ४९ हजार रुपैयाँको विभिन्न फर्निचर आयात गरेको छ । यो अवधिमा दुई अर्ब ६८ करोड ३२ लाख पाँच हजार रुपैयाँको विभिन्न प्रकारका रेफ्रिजेरेटर नेपाल भित्र्याइएको छ ।

नेपालले यो अवधिमा ६ अर्ब रुपैयाँभन्दा बढीको विभिन्न प्रकारका मेकअप सामग्री आयात गरेको विभागले जनाएको छ ।