काठमाडौं । त्रिभुवन विश्विद्यालय (त्रिवि)को उपकुलपतिमा प्रा.डा. केशरजंग बराल नियुक्त भएका छन् । प्रधानमन्त्री तथा त्रिविका कुलपति पुष्पकमल दाहाल 'प्रचण्ड'ले बिहीवार डा. बराललाई उपकुलपति नियुक्त गरेका हुन् ।

उपकुलपति सिफारिस समितिले सिफारिस गरेका तीनजनामध्येबाट प्रधानमन्त्रीले बराललाई नियुक्त गरेका हुन् ।

त्रिविमा पहिलोपटक खुला प्रतिस्पर्धामार्फत उपकुलपति चयन गरिएको हो । शिक्षामन्त्री अशोककुमार राईको अध्यक्षतामा गठित तीन सदस्यीय सिफारिस समितिले फागुन ६ गते तीन जनाको नाम सिफारिस गरेको थियो ।

उपकुलपतिका निम्ति परेका ४३ आवेदनमध्येबाट विभिन्न चरणको छनोट प्रक्रियापछि डा. चित्रबहादुर बुढाथोकी, प्रा.डा. केशरजंग बराल र प्रा.डा. टंकनाथ धमला सिफारिस भएका थिए ।

यसअघिका उपकुलपति डा. धर्मकान्त बास्कोटाको चारवर्षे पदावधि कार्तिक १६ देखि सकिएपछि त्रिविमा सो पद रिक्त थियो  । निमित्त उपकुलपतिको जिम्मेवारीमा त्रिविका शिक्षाध्यक्ष डा. शिवलाल भुसाल थिए ।

डा. बराल वित्त तथा अर्थशास्त्र पृष्ठभूमिका प्राध्यापक हुन् । उपप्राध्यापकको रूपमा महेन्द्र मोरङ क्याम्पसबाट अध्यापन सुरु गरेका बराल सन् २००७ दखि २०११ सम्म पोखरा विश्वविद्यालयको उपकुलपति भएका थिए ।

डा. बरालले दिल्ली विश्वविद्यालयबाट क्यापिटल ‘स्ट्रक्चर एन्ड कस्ट अफ क्यापिटल’मा पीएचडी गरेका छन् ।

पाठ्यक्रम विकास केन्द्रका संयोजक, नेपाल खुला विश्वविद्यालय, एसियाली विकास बैंक लगायतका विभिन्न निकायमा उनले महत्त्वपूर्ण जिम्मेवारी पाएका थिए ।  साथै अमेरिकाका सेन्ट क्लाउड विश्वविद्यालय तथा चिनका विश्विद्यलयमा भिजिटिङ प्रोफेसरको रूपमा उनले अनुभव बटुलेका छन् ।