काठमाडौं । नेकपा (एमाले) मा आर्थिक र नैतिक आचरणलाई कसरी स्वच्छ बनाउने भन्ने बहस सुरु भएको छ । आजबाट सुरु भएको केन्द्रीय कमिटीमा शीर्ष नेताले प्रस्तुत गरेको प्रतिवेदनमा आर्थिक आचरण र नैतिक आचरणमा कानुनी र नैतिक बन्धन तोड्न खोज्ने विकृति हुर्कंदै गएको उल्लेख छ ।

“प्रचलित कानुन प्रतिकूल, नैतिक दृष्टिले अनुचित र अपारदर्शी आर्थिक क्रियाकलाप देखापर्न थालेका छन् । आर्थिक आचरण र यौन आचरणमा कानुनी र नैतिक बन्धन तोड्न खोज्ने विकृति हुर्किंदै छन् । यस्तो प्रवृत्तिले नेता, कार्यकर्ता र समग्र पार्टीलाई जनताबाट अलग गर्ने खतरा पैदा भएको,” दस्तावेजमा उल्लेख छ । 

आर्थिक–सामाजिक क्रियाकलाप, यौन आचरण र नैतिक दृष्टिले गल्ती गर्नेहरूलाई सम्बन्धित कमिटीमा छलफलको कार्यसूची र कारबाहीको विषय नबनाउँदा त्यस्तो प्रवृत्ति प्रोत्साहित हुन पुगेको निष्कर्ष प्रस्तुत गरिएको छ । 

केन्द्रीय कमिटी बैठकमा चारवटा कार्ययोजना प्रस्तुत भएका छन् ।

प्रस्तुत गरिएका कार्ययोजना र प्रस्तावहरूमाथि छलफल गर्नका लागि समग्र केन्द्रीय कमिटीको टिमलाई नौवटा समूहमा विभाजन गरिएको छ ।

पार्टी स्थायी कमिटीको एउटा समूह, सात प्रदेशका सात समूह र बाँकी एउटा समूह उपत्यका विशेष समन्वय कमिटी, सम्पर्क समन्वय कमिटी र जनसंगठन विभागहरू छन् ।