काठमाडौं । नेपाली कांग्रेसका सांसद दीपक खड्काले आफूले विधिसम्मत ढंगले नेपाल स्काउटको संरचना भाडामा लिएको बताएका छन् । आइतबार प्रतिनिधिसभा बैठकको आकस्मिक समयमा उनले आफूले वि.सं. २०६३ सालमा टेन्डर प्रक्रियामार्फत स्काउटको भवन भाडामा लिएको बताएका हुन् ।
१० वर्षपछि पुनः टेन्डरमार्फत सबै प्रक्रिया पूरा गरेर भाडामा लिएको भए पनि आफ्नो चरित्र हत्या गरिएको उनको भनाइ छ ।
उनले ०७५ सालमा लोकबहादुर भण्डारी प्रमुख भएर आएपछि स्काउटमा विवाद र किचलो सुरु भएको बताए । आफूलाई सत्ताको बलमा उतिखेरै निकाल्न खोजिएको उनले जिकिर गरे ।
आफ्नो कुनै कमजोरी नभएको र अदालतमा मुद्दा विचाराधीन रहेको भन्दै उनले कुनै दोष देखिएमा कारबाहीको भागीदार हुने बताए ।
“यो विधिवत् ढंगले २०६३ सालमा टेन्डरमार्फत त्यहाँका भवनहरू भाडामा लिइएको हो । र, १० वर्षपछि पुनः टेन्डरमार्फत त्यस भवनको प्रक्रिया पूरा गरेर भाडामा लिएको हो,” उनले भने ।
उनले आफूले स्काउटलाई अहिलेसम्म भाडाबापत १३ करोड रुपैयाँ बुझाइसकेको पनि बताए । अध्यक्ष भण्डारीले ऐन, नियमविपरीत स्काउटलाई कब्जा गरेको आरोप उनले लगाए । न्युज एजेन्सी नेपाल
