काठमाडौं । नइ प्रकाशनले २०७९ सालको ‘नइ देरुनीख अन्तर्राष्ट्रिय पुरस्कार’ नेपाली भाषासाहित्यको अन्तर्राष्ट्रिय विस्तारमा महत्त्वपूर्ण योगदान दिने भारत आसामका नव सापकोटालाई समर्पण गर्ने निर्णय गरेको छ । पुरस्कारकासाथ नगद राशि दुई लाख प्रदान गरिने प्रकाशनका सदस्यसचिव नरेन्द्रराज प्रसाईंले जानकारी गराएका छन् । 

त्यस्तै, प्रकाशनले सिर्जनाद्वारा नेपाली भाषासाहित्यको श्रीवृद्धिमा योगदान पुर्याउने दार्जिलिङकी स्नेहलता राईलाई ‘नइ गणेशदुर्गा अन्तर्राष्ट्रिय पुरस्कार’ समर्पण गर्ने निर्णय गरेको छ । यस पुरस्कारकासाथ नगद राशि एक लाख रुपियाँ प्रदान गरिने जनाइएको छ । 

दुवै पुरस्कार नेपाली भाषासाहित्यमार्फत अन्तर्राष्ट्रिय क्षेत्रमा ख्याति कमाएका नेपाली मूलका विदेशी व्यक्तित्वलाई हरेक वर्ष प्रदान गर्दै आइएको प्रसाईंले जानकारी दिएका छन् ।