काठमाडौं । चालु आर्थिक वर्ष २०८०/०८१ को पहिलो सात महिनामा वैदेशिक रोजगारीमा जान अन्तिम श्रम स्वीकृति लिने नेपालीको संख्या १५.३० प्रतिशतले घटेको छ । 

वैदेशिक रोजगार विभागले सार्वजनिक गरेको विवरणअनुसार चालु आर्थिक वर्ष २०८०/०८१ को पहिलो सात महिना (साउनदेखि माघ मसान्तसम्म)मा कुल चार लाख पाँच हजार ५५२ जनाले वैदेशिक रोजगारीमा जान श्रम स्वीकृति लिएका छन् । 

अघिल्लो आर्थिक वर्ष २०७९/०८० को सोही अवधिमा वैदेशिक रोजगारीमा जानको लागि चार लाख ७८ हजार ८३० जनाले श्रम स्वीकृति लिएका थिए । वैदेशिक रोजगारीमा जानेलाई विभागले श्रम स्वीकृति दिने गर्छ ।
 
अघिल्लो आर्थिक वर्षको तुलनामा चालु आर्थिक वर्षको पहिलो सात महिनामा वैदेशिक रोजगारीमा जानेको संख्या ७३ हजार २७८ ले घटेको छ । 

विभागले सार्वजनिक गरेको विवरणअनुसार गत माघ महिनामा ६२ हजार १४७ नेपालीले वैदेशिक रोजगारीमा जान श्रम स्वीकृति लिएका छन् । यो संख्या नयाँ श्रम स्वीकृति लिने र नवीकरण गर्ने दुवैको हो । 

योसँगै चालु आर्थिक वर्षको पहिलो सात महिनामा वैदेशिक रोजगारीमा जानको लागि श्रम स्वीकृति लिनेको संख्या ४ लाख ५ हजार ५५२ पुगेको हो । 

विभागका अनुसार २०८० सालको साउनमा ५५ हजार ५७५, भदैमा ५० हजार ८८४, असोजमा ५६ हजार २३५, कात्तिकमा ४३ हजार ६२२, मंसिरमा ७१ हजार २७६, पुसमा ६५ हजार ८१३ र माघ ६२ हजार १४७ जनाले श्रम स्वीकृति लिएका छन् । 

यस्तै, २०७९ सालको साउनमा ६३ हजार ३९, भदौमा ७६ हजार ४०३, असोजमा ६२ हजार ७०६, कात्तिकमा ७८ हजार ३७०, मंसिरमा ६८ हजार ५६४, पुसमा ६५ हजार ४६४ र माघमा ६४ हजार २८४ जनाले वैदेशिक रोजगारीमा जान श्रम स्वीकृति लिएका थिए ।

चालु आर्थिक वर्षको पहिलो सात महिनामा वैदेशिक रोजगारीमा जानेको संख्या घटे पनि नेपाल भित्रने रेमिट्यान्स भने बढेको छ । 

नेपाल राष्ट्र बैंकका अनुसार चालु आर्थिक वर्ष २०८०/०८१ को पहिलो ६ महिना (साउनदेखि पुससम्म) नेपाल भित्रने रेमिट्यान्स २५.३ प्रतिशतले वृद्धि भएको छ । 

२०८० साउनदेखि पुस मसान्तसम्म सात खर्ब ३३ अर्ब २२ करोड रुपैयाँ रेमिट्यान्स नेपाल भित्रिएको राष्ट्र बैंकले जनाएको छ । 

अघिल्लो आर्थिक वर्ष २०७९/०८० को सोही अवधिमा नेपाल भित्रने रेमिट्यान्स २४.३ प्रतिशतले बढेको थियो ।