काठमाडौं । पत्रकार महासंघ प्रतिष्ठान प्रदेशले प्रकाशित गरेको पुस्तक ‘अग्र अनुहार’ विमोचन भएको छ । प्रतिष्ठान प्रदेशले पत्रकार महासंघका संस्थापक सभापति कृष्णप्रसाद भट्टराईदेखि वर्तमान अध्यक्ष विपुल पोखरेलसम्मलाई समेटेर महासंघको नेतृत्व गरेका २३ जनाको पत्रकारिता र उनीहरूको संघर्षको कथा समेटेर पुस्तकका रूपमा विमोचन गरेको हो ।

पुस्तकमा महासंघको नेतृत्व गरेकाहरूले पत्रकारिता गर्दाको अनुभव, प्रेस स्वतन्त्रताको रक्षाका लागि भएका संंघर्ष, राजनीतिक उतारचढावले पत्रकारिता क्षेत्रमा पारेको प्रभाव समेटिएको छ ।

प्रतिष्ठान प्रदेशका अध्यक्ष बालकृष्ण अधिकारीको नेतृत्वमा पुस्तक प्रकाशित भएको हो । विमोचनका क्रममा भने पुस्तक विवादित बन्यो ।

जनजाति पत्रकार महासंघ (फोनिज)ले 'सत्यनारायणबहादुर सिंह नेपाल पत्रकार महासंघको संस्थापक अध्यक्ष भएको तर उनको नाम नराखिएको' भन्दै विमोचन कार्यक्रममै पुस्तक च्यातिदिएको छ । फोनिजका प्रतिनिधिले कार्यक्रममै नाराबाजी गर्दै विमोचनका लागि हातमा लिइएको पुस्तक खोसेर च्यातिदिएका थिए ।

पत्रकार महासंघ प्रतिष्ठान प्रदेशका अध्यक्ष अधिकारीले भने महासंघका अध्यक्षको आधिकारिकता दिने काम प्रतिष्ठान प्रदेशको नभएको स्पष्टीकरण दिए । उनले आफूहरूले महासंघको कार्यालयमा राखिएको फोटो र दस्ताबेजलाई आधार मानेर पुस्तक प्रकाशित गरेको पनि बताए । महासंघको दस्ताबेजभन्दा बाहिर गएर प्रतिष्ठानले काम गर्न नसक्ने उनको भनाइ थियो ।

“उहाँहरूले संस्थापकको विषयमा प्रश्न उठाउनुभएको सुनियो । तर, संस्थापक अध्यक्षको निर्क्योल प्रतिष्ठान प्रदेशले गर्ने होइन,” अधिकारीले भने, “हामीले पत्रकार महासंघको कार्यालयमा राखिएको फोटो र उपलब्ध दस्ताबेजलाई आधार बनाएर पुस्तक प्रकाशित गरेका हौँ ।”

नेपाल पत्रकार महासंघमा केही समयदेखि नेकपा (एमाले) निकट प्रेस चौतारीले पत्रकार महासंघको संस्थापक अध्यक्ष कृष्णप्रसाद भट्टराई नभएको तर्क अघि सारेको छ । उसले सत्यनारायणबहादुर सिंह संस्थापक भएको दाबी गर्दै आएको छ । चौतारीकै उमेदवार भएर पत्रकार शिव गाउँले र महेन्द्र विष्टले महासंघको नेतृत्व गरिसकेका छन् ।

तर, उनीहरू नेतृत्वमा रहँदा पनि महासंघको संस्थापक अध्यक्ष कृष्णप्रसाद भट्टराई नभएको उल्लेख गर्ने र दस्ताबेज सच्याउने काम भएको देखिँदैन । तर, चौतारीले उठाएको मुद्दामा टेकेर आइतबार फोनिजका प्रतिनिधिले विमोचनस्थलमै पुगेर पुस्तक च्यातेका हुन् ।