काठमाडौं । प्रहरीले गौशालाको विजयचोकस्थित एक गेस्ट हाउसमा मृत भेटिएकी महिलाको हत्या भएको आशंका गरेको छ । शनिबार सिरहा–धनुषा गेस्ट हाउसमा ३५–४० वर्षकी देखिने एक महिलाको शव फेला परेको थियो ।

तर, ती महिलाको हत्या भएको हुन सक्ने प्रहरीको अनुसन्धानले देखाएको छ । मृत भेटिएकी महिला बस्ने कोठा सन्दीप लामाको नाममा बुक भएको खुलेपछि महिलाको हत्या भएको आशंका प्रहरीले गरेको हो । लामा हाल फरार छन् ।

प्रहरीका अनुसार शुक्रबारदेखि महिला र सन्दीप कोठामा बसेको खुलेको छ । प्रहरीले घटनाको अनुसन्धान अघि बढाएको छ ।

टोखामा भेटियो युवकको शव, हत्याको आशंका

त्यस्तै, टोखा नगरपालिका–६ धापासीस्थित टहरामा बस्दै आएका ओखलढुंगाका २३ वर्षीय दिपेश खड्काको शव पनि प्रहरीले शनिबार फेला पारेको थियो । उनको पनि हत्या भएको आशंका प्रहरीले गरेको छ ।

दुवै घटनाबारे प्रहरीले थप अनुसन्धान अघि बढाएको काठमाडौं प्रहरीका एसपी कुमोध ढुंगेलले जानकारी दिए ।