विराटनगर । कोसीका मुख्यमन्त्री केदार कार्कीले फस्ट बेन्चर र लास्ट बेन्चर विद्यार्थीको ज्ञानको मापन अंकमा गर्ने व्यवस्था बदल्नु पर्ने बताएका छन् ।
विराटनगरमा न्यू सृष्टि दैनिकको वार्षिकोत्सव एवम् सम्मान कार्यक्रममा मुख्यमन्त्री कार्कीले ज्ञानको मापन अक्षरमा नभइ खोज र अनुसन्धानका आधारमा हुनुपर्ने बताएका हुन् ।
“फस्ट बेन्चर र लास्ट बेन्चरको ज्ञान र क्षमताको मापन अक्षरबाट हुँदैन र गर्न पनि मिल्दैन,” उनले भने, “अल्बर्ट आइन्स्टाइन लगायतका व्यक्तिहरू किताबी ज्ञानले नभइ प्रकृतिबाट प्राप्त शिक्षाले वैज्ञानिक भएको बुझ्नु आवश्यक छ तर अहिलेका अभिभावकहरू पनि आफ्ना बालबालिकाको शिक्षा र ज्ञानको मापन नम्बरमा नै खोजिरहेका छन् ।”
त्यसैले अब अहिलेको शैक्षिक व्यवस्था बदलेर अब्बल नागरिक बनाउने व्यवस्थामा जानुपर्ने मुख्यमन्त्री कार्कीले बताएका हुन् । शिक्षा र ज्ञान फरक विषय भएको सबैले बुझ्नु आवश्यक भएको उनको भनाइ थियो ।
“सामुदायिक विद्यालयहरूमा अहिले अंग्रेजी र नेपाली माध्यमबाट छुट्टाछुट्टै भाषामा शिक्षा दिएर विद्रोहको बीउ रोपिरहेको छ,” उनले भने, “धनी भएको कारण अंग्रेजी र गरिब भएकोले नेपाली माध्यममा शिक्षा प्राप्त गरेको असर बालबालिकामा कस्तो पर्छ भन्ने बुझ्नु पर्दैन ?”
विद्यालयको एउटै छानामुनि दुई खाले विभेदकारी शिक्षा दिन मिल्छ भन्दै मुख्यमन्त्री कार्कीले प्रश्न गरेका थिए । “त्यही गरिब विद्यार्थीले विभेदकारी शिक्षाविरूद्ध विद्रोह गर्याे भने के गर्ने ?”, उनले भने, “त्यसैले समान शिक्षा र ज्ञानका लागि शिक्षा प्रणाली नसुध्रुञ्जेल अभियान जारी राख्छु ।”
