विराटनगर । कोसी प्रदेश सरकार र पहिचान पक्षधरबीच वार्ता सकिएको छ । प्रदेश सरकारको सरकारी वार्ता टोली र पहिचान  पक्षधरसँगको वार्ता बिहीबार र आज (शुक्रबार) चलेको थियो । वार्ता सकारात्मक रूपमा अघि बढेको वार्ता टोलीका संयोजक कोसीका भौतिक पूर्वाधार विकासमन्त्री कमलप्रसाद जबेगले बताए ।

प्रदेश सरकार र पहिचान पक्षधरले संविधानसम्मत ढंगले प्रदेशको पुनः नामकरणका लागि राजनीतिक वातावरण बनाउन संयुक्तरूपमा पहल गर्ने सहमति भएको छ ।

पहिचान पक्षधरले निषेधको आन्दोलन फिर्ता लिएर शान्तिपूर्ण आन्दोलन गर्ने, आन्दोलनमा घाइते भएकाहरूको निःशुल्क उपचार, आन्दोलनकारीहरूमाथि लगाइएको मुद्दा प्रदेश सरकारले फिर्ता लिने र फागुन १० गते अगावै दुवै पक्षको सहमतिमा पुनः वार्ताका लागि मिति तोक्ने सहमति भएको मन्त्री जबेगुले बताए । पहिचानवादीले अब सांसद तथा मन्त्रीलाई जिल्ला प्रवेशमा रोक नलगाउने बताइएको छ ।

यो वार्ताले प्रदेशमा शान्तिपूर्ण वातावरण बनेकोले विकास समृद्धिको कामले तीव्रता पाउने मुख्यमन्त्री केदार कार्कीले बताएका छन् ।