काठमाडौं । रोमाञ्चक खेलमा इरानविरुद्ध ३–२ को जित निकाल्दै साविक विजेता कतार एएफसी एसियन कपको फाइनलमा प्रवेश गरेको छ ।

बुधबार कतारको अल थुमाम रंगशालामा सम्पन्न खेलमा १–० ले पछि परेको अवस्था उल्ट्याउँदै घरेलु टिमले फाइनल यात्रा तय गरेको हो । 

खेलको चौथो मिनेटमा अर्दार अजुमोउनले गोल गर्दै इरानलाई अग्रतामा राखेका थिए । तर, १७औँ मिनेटमा जासिम गाबेर अब्दुलसलामले गोल गर्दै घरेलु टिमलाई खेलमा फर्काएका थिए । ४३औँ मिनेटमा अक्रम अफिफले गोल गरेपछि कतारले पहिलो हाफमा २–१ को अग्रता बनाएको थियो । 

५१औँ मिनेटमा अलिरेजा जाहानबक्सले पेनाल्टी सदुपयोग गर्दै पुनः इरानलाई खेलमा फर्काएका थिए । तर, खेलको निर्धारित समय सकिन आठ मिनेट बाँकी रहँदा अल्मोइज अली निर्णायक गोल गरेपछि कतार रोमाञ्चक जितसहित लगातार दोस्रो पटक फाइनलमा प्रवेश गरेको हो ।

इन्जुरी समयमा ओजाइ खलिलजदेहले रातो कार्ड पाउँदै मैदान छोडेपछि इरान १० खेलाडीमा समेटिएको थियो ।

कतारले अब उपाधिका लागि फेब्रुअरी १० मा जोर्डनसँग खेल्ने छ । यसअघि जोर्डनले पहिलो सेमिफाइनलमा दक्षिण कोरियालाई २–० ले हराउँदै पहिलोपटक एसियन कपको फाइनलमा स्थान बनाएको थियो ।