![अरूण चौधरीसहित तीनजनालाई थप दुई दिन हिरासतमा राख्न अनुमति*](https://12khari.top/uploads/posts/arun-chaudhari-1706789981.jpg)
काठमाडौं । बाँसबारी छाला जुत्ता कारखानाको १० रोपनी सरकारी जग्गा हिनामिना गरेको आरोपमा पक्राउ परेका उद्योगपति अरूण चौधरीसहित तीनजनालाई थप दुई दिन* हिरासतमा राख्न अदालतले अनुमति दिएको छ ।
काठमाडौं जिल्ला अदालतका न्यायाधीश यज्ञप्रसाद आचार्यको इजलासले सोमबार चौधरीलाई थप दुई दिन हिरासतमा राख्ने अनुमति दिएको अदालतका सूचना अधिकारी चन्द्रप्रसाद पन्थीले जानकारी दिए ।
सीआईबीले चौधरीसहित तत्कालीन बाँसबारी छाला जुत्ता कारखानाका लिमिटेडका कार्यकारी अध्यक्ष अजितनारायण सिंह थापा र सीजी चाँदबाग रेसिडेन्सी प्रा.लि.का सञ्चालक सञ्जय ठाकुरलाई हिरासतमा राखेर अनुसन्धान गरिरहेको छ ।
बाँसबारी छालाजुत्ता उद्योगको जग्गा प्रक्ररणमा पक्राउ परेका तीनैजना स्वास्थ्यको कारण देखाई ग्रान्डी अस्पतालमा छन् । प्रहरीले उनीहरूलाई सरकारी वकिल कार्यालयका प्रमुख सन्देश श्रेष्ठको रोहवरमा बयान गरेको थियो ।
*यसअघि चौधरीको पक्षबाट बहस गरेका वरिष्ठ अधिवक्ता शम्भु थापाले तीन दिनको अनुमति दिएको बताएका थिए । तर, अदालतका सूचना अधिकारीले दुई दिनको अनुमति दिएको बताएकाले भुलसुधारसहित सच्याइएको छ ।