काठमाडौं । नेकपा (एमाले)का सांसद देवेन्द्र दाहालले संघीय संसद्को महासचिव नियुक्ति प्रक्रियामा राष्ट्रपति रामचन्द्र पौडेलले चलखेल गरेको आरोप लगाएका छन् । सोमबार राष्ट्रियसभाको बैठकमा उनले यस्तो आरोप लगाएका हुन् ।

उनले संघीय संसद्को महासचिव पद खाली अवस्थामा हुनु र अधिवेशन सुरु भइसक्दा पनि कार्यवाहकबाट काम चलाउनुपर्ने परिस्थिति किन सिर्जना भयो ? भन्दै प्रश्न गरे । महासचिवमा नियुक्त प्रक्रियामा राष्ट्रपतिले राजनीति गरेको उनको आरोप थियो ।

उनले राष्ट्रपति पौडेललाई महासचिव पदमा चलखेल नगर्न चेतावनी दिए । कानुनानुसार सिफारिस गरिएको महासचिव अविलम्ब नियुक्त गर्न उनले आग्रह गरे ।

आउँदा बैठकहरूमा राष्ट्रपतिका बारेमा कडा शब्द प्रयोग गर्नुपर्ने स्थिति नबनाउन समेत उनले चेतावनी दिए । राष्ट्रपति पदको गरिमालाई कायम राख्न उनले आग्रह गरे ।

“...कार्यवाहकबाट काम चलाउनुपर्ने परिस्थिति किन सिर्जना भयो ? हामीले कस्तो राष्ट्रपति पायौँ ? निकै लामो अध्ययन, चिन्तन गर्ने,” उनले भने, “राष्ट्रपतिज्यू, तपाईंको अध्ययन, चिन्तन अब बढी भएन र ? एउटा संसद्को महासचिवमा तपाईंको चलखेल किन ?”

उनले थपे, “मलाई विश्वास छ, आगामी बैठकहरूमा हामीले सम्माननीय राष्ट्रपतिको बारेमा अलि कडा शब्द प्रयोग गर्नुपर्ने छैन । राष्ट्रपति भनेको सम्मानित पद हो । यसको गरिमालाई कायम राख्न आग्रह गर्दछु ।”

नेता दाहालले सत्ताधारी गठबन्धनको अकर्मण्यताका कारण राजनीतिक व्यवस्था कमजोर बनेको जिकिर गरे । न्युज एजेन्सी नेपाल