काठमाडौं । नेपालका निरज तामाङले टाटा स्टील पीजीटीआई क्वालिफाइङको अन्तिम चरणमा स्थान बनाउन सफल भएका छन् । क्यू–स्कुल तेस्रो चरणमा समग्रमा ८–अन्डर १३४ को प्रदर्शनसहित तेस्रो हुँदै निरजले अन्तिम चरणमा स्थान बनाएका हुन् ।

३६ होलको प्रतिस्पर्धामा निरजले शनिबार ५–अन्डर ६६ को उत्कृष्ट स्कोर कार्ड दर्ज गर्दै तेस्रो स्थान हासिल गरे । पहिलो दिन ३–अन्डर खेलेका निरजले दोस्रो दिन लोभलाग्दो प्रदर्शन गर्ने क्रममा फ्रन्ट नाइन १–अन्डर ३४ मा सकाए ।

३–पारको पहिलो होलमा बर्डी प्रहार गरेका निरजले यसपछि दोस्रोदेखि नवौँ होलसम्म पार बचाए । ब्याक नाइनमा निरजले प्रभावशाली प्रदर्शन गरे । १०औँ र १४औँ होलमा एक/एक सट बचाए भने ५–पारको १८औँ होलमा इगलको सफलता प्राप्त गरे । उनले बोगी फ्री स्कोरकार्ड दर्ज गरे ।

१३औँ दक्षिण एसियाली खेलकुदका स्वर्णपदक विजेता निरजको यो करियरको सम्झनलायक प्रदर्शन पनि हो । उनले चिली र चेक गणतन्त्रका दुई गल्फरबाहेक सहभागी १२१ गल्फरलाई पछि पारे ।

पहिलो भएका चिलीका माटियास डोमीन्युजले १५–अन्डर १२७ को सानदार नतिजा निकाले । चेक गणतन्त्रका स्टेफन डानेक ९–अन्डर १३३ को स्कोरसहित दोस्रो भए ।

नेपालबाट सहभागी चार गल्फरमध्ये निरज मात्र अन्तिम चरणमा प्रवेश गर्न सफल रहे । युवराज भुजेल र धनबहादुर थापा समग्रमा ४–ओभर १४६ सहित संयुक्त रूपमा ४८औँ स्थानमा रहँदा सविन सापकोटा १९–ओभर १६१ सहित समग्रमा १०५औँ स्थानमा रहँदै क्यू–स्कुलबाट बाहिरिए । युवराजले आज १–ओभर ७२, धनले २–ओभर ७३ र सविनले ८–ओभर ७९ को नतिजा निकाले ।

निरजले अब फेब्रुअरी ६ देखि ९ सम्म हुने टाटा स्टील पीजीटीआई क्वालिफाइङ स्कुल–२०२४ को अन्तिम चरणमा प्रतिस्पर्धा गर्नेछन् । गत डिसेम्बरमा कोलकाताको रोयल कलकत्ता गल्फ क्लबमा भारतको आईजीयू ११२औँ एमेच्योर गल्फ च्याम्पियनसिप जितेका शीर्ष नेपाली एमेच्योर सुवास तामाङले सोझै फाइनलमा स्थान बनाइसकेका छन् । पीजीटीआईको कार्डका लागि नेपालका सुवास र निरजले दाबेदारी प्रस्तुत गर्नेछन् ।