काठमाडौं । पूर्वराष्ट्रपति विद्यादेवी भण्डारीले नेकपा (एमाले)का अध्यक्ष केपी शर्मा ओलीलाई सर्वाधिक प्रतिभाशाली नेताका रूपमा चित्रण गरेकी छन् । मंगलबार काठमाडौंमा ‘संसद्‌मा केपी शर्मा ओली’ नामक पुस्तक विमोचन गर्दै उनले ओली सबैका निम्ति प्रेरणा र ज्ञानको स्रोत भएको बताइन् ।

सो पुस्तकले नेपाली संसद्को इतिहास, तत्कालीन राजनीतिक अवस्था र परिवर्तनका विषयमा एमालेले खेलेको भूमिका उजागर गरेको भण्डारीको भनाइ छ ।

“यस पुस्तकका नायक केपी शर्मा ओलीज्यू समकालीन राजनीतिक नेताहरूमा पृथक् पहिचान बनाउनुभएको नेता हुनुहुन्छ । सर्वाधिक प्रतिभाशाली नेताको रूपमा उच्च स्थान प्राप्त गर्न सफल उहाँ नेकपा (एमाले)को अध्यक्ष र प्रधानमन्त्री समेत भइसक्नुभएको व्यक्तित्व हुनुहुन्छ,” उनले भनिन्, “उहाँ राजनीतिक साथै कला, साहित्य, संस्कृति एवं धर्मदर्शन र विज्ञानलगायत विषमा समेत गहन ज्ञान भएको नेता हुनुहुन्छ । सघन अध्ययन र संघर्षमय जीवनको लामो अनुभवले खारिनुभएका नेता ओली हाम्रा लागि सदैव प्रेरणा र ज्ञानको स्रोत हुनुहुन्छ ।”