काठमाडौं । प्रमुख प्रतिपक्ष दल नेकपा (एमाले)का सांसद रघुजी पन्तले सार्वजनिक सेवा प्रशारण विधेयकले अहिलेको डिजिटल र न्यू मिडियालाई सम्बोधन नगरेको बताएका छन् । 

सोमबार सार्वजनिक प्रसारण विधेयकमाथि शिक्षा, स्वास्थ्य तथा सूचना प्रविधि समितिमा भएको छलफलमा बोल्दै सांसद पन्तले सो कुरा बताएका हुन् ।

“रेडियो र टीभीको युगबाट हामी अघि बढ्नुपर्छ, आजभोलि टीभीको अन्तर्वार्ता युट्युबमा हेर्छन् । अहिले टीभी, रेडियो, पत्रिकाभन्दा डिजिटल मिडिया हेर्छन्,” सांसद पन्तले भने, “यो विधेयक चार वर्षअघि आएको हो, यो विधेयकले अहिलेको डिजिटल र न्यु मिडियालाई सम्बोधन गरेन । विश्वसँगै नेपालमा पनि डिजिटल मिडिया आइसक्यो ।”  

उनले आजको मिडिया र यसको चुनौती बुझेर विधेयक ल्याउन आग्रह गरे । 

"टीभी युट्युबमा हेरिन्छ । प्रिन्ट अनलाइनमा पढिन्छ । त्यसैले यसलाई रिस्टकचर गरौँ । आजको मिडिया र यसको चुनौती बुझेर विधेयक ल्याउ," उनले भने ।