काठमाडौं । इन्डोनेसियाविरुद्ध ४–० को जित निकाल्दै एकपटकको च्याम्पियन अस्ट्रेलिया एएफसी एसियन कपको क्वार्टरफाइनलमा प्रवेश गरेको छ ।

आइतबार कतारको जासिम बिन हमाद रंगशालामा अस्ट्रेलियालाई जित दिलाउन मार्टिन बोइले, क्रेग गोड्विन र ह्यारी सोटारले गोल गरे । अस्ट्रेलियाले अर्को एक गोल इन्डोनेसियाका एल्कान बागोटबाट आत्मघाती उपहार पाएको थियो ।

खेलको १२औँ मिनेटमा बागोटबाट पाएको आत्मघाती गोलबाट अस्ट्रेलियाले अग्रता बनाएको थियो । पहिलो हाफको अन्तिम मिनेटमा बाइलेले गोल गर्दै अस्ट्रेलियाको अग्रता दोब्बर बनाए ।

खेलको निर्धारित समय सकिन एक मिनेट बाँकी रहँदा गोड्विनको गोलबाट अस्ट्रेलियाले अग्रतालाई ३–० मा पुर्‍यायो । इन्ज्युरी समयमा सोटारले गोल गरेपछि अस्ट्रेलियाले ४–० को जितसहित अन्तिम–८ को यात्रा निश्चित गर्‍यो ।

ताजिकिस्तान पहिलोपटक क्वार्टरफाइनलमा
आइतबार नै भएको अर्को खेलमा युनाइटेड अरब इमिरेट्स (यूएई)विरुद्ध पेनाल्टी सुटआउटमा ५–३ को जित निकाल्दै ताजिकिस्तान पहिलोपटक एसियन कपको क्वार्टरफाइनलमा प्रवेश गरेको छ ।

कतारको अहमेद बिन अली रंगशालामा खेलको निर्धारित समय १–१ को बराबरीमा सकिएपछि पेनाल्टी सुटआउटबाट नतिजाको निर्णय भएको हो । पेनाल्टीमा यूएईबाट दोस्रो प्रहारका लागि आएका काइओ कानेडो गोल गर्न चुके । ताजिकिस्तानका पाँच खेलाडीले नै पेनाल्टीमा गोल गरे । यूएईले अन्तिम पेनाल्टी प्रहारको अवसर नै पाएन ।