विराटनगर । नेपाली कांग्रेसका महामन्त्री गगन थापा कुनै बेला टोलाएजस्तो देखिन्थे । घरी गम्भीर मुद्रामा प्रस्तुत भइरहेका थिए । बेलाबेलामा सहभागीतिर पुलुक्क हेर्थे । अनि, निहुरिएर डायरीमा फटाफट टिपोट गर्थे । कुनै बेला प्रश्नकर्ताको हाउभाउ र भावभंगीलाई एकटकले नियालेको देखिन्थ्यो । फेरि डायरीमा लेख्न थाल्थे ।

‘संवाद यात्रा’का क्रममा उनी आइतबार बिहान करिब साढे ११ बजे मोरङको कटहरी आइपुगेका थिए । स्वागत गर्न नेता–कार्यकर्ताको ठूलो पंक्ति सडकमै लामबद्ध देखिन्थ्यो । स्वागत र सम्मान थाप्दै उनी कटहरी गाउँपालिकाका कांग्रेस नेता रामकुमार कामतको आँगनतिर लम्किए ।

अतिथिका निम्ति राखिएको प्लास्टिकका कुर्सीमा नेताहरू एक लहरले बसे । खासै औपचारिकता भएन । उपस्थित स्थानीय नेता–कार्यकर्ता र सर्वसाधारणले प्रश्न गर्न सुरु गरे ।

महिला बसेको स्थानबाट एक्कासि आवाज सुनियो, “माइक हमरा दिय ।” आक्रोशित भावमा प्रश्नकर्ताले सोधिन्, “महामन्त्रीज्यू, यो गठबन्धन किन गरिरहेको ?”

“गठबन्धनकै कारण मेरो श्रीमान्ले अर्कै पार्टी रोज्नुभयो, तर म २० वर्षदेखि कांग्रेसमै छु,” सहनीले भनिन्, “गठबन्धनले गर्दा कांग्रेस हार्छ, माओवादी जित्छ किन ?” जितेर गएका आफ्नै पार्टीका पालिका प्रमुखले नमस्कारसम्म फर्काउन छाडेको उनले सुनाइन् ।

दिगमलाल कामतले पनि गठबन्धनसँग सम्बन्धित प्रश्न नै तेर्स्याए । उनले भने, “कांग्रेस गाउँमा जिउँदै छ महामन्त्रीज्यू, यही सन्देश लिएर जानुहोस् । तर, गाउँ सुधार्न जिल्ला सुधार्नुहोस्, क्षेत्र सुधार्नुहोस् । त्यसभन्दा पहिले केन्द्र सुध्रानुहोस् ।”

सन्तनु रेग्मीले कांग्रेसीको चरित्रबारे बताए । नेताले जनता खोज्दै आउने परिपाटी भत्किएर अहिले जनताले खोज्दै नेताको घरघर धाउनुपर्ने अवस्था सिर्जना भएको उनले सुनाए । “कांग्रेसभित्र पञ्चायतको पुनरावृत्ति भइरहेको छ,” उनले भने ।

सहभागीले कांग्रेस सरकारमा भएको जनताले महसुस गर्न नसकेको गुनासो गरे । मन्त्री र सांसद आफ्नो क्षेत्रको जस्तो मात्र भएको उनीहरूको भनाइ थियो ।

कार्यक्रमबारे केन्द्रीय सदस्यलाई समेत औपचारिक जानकारी नगराइएको भन्दै संवाद यात्रा ‘महामन्त्री थापाको व्यक्तिगत मात्र हो वा पार्टीको ?’ भन्दै प्रश्न गरिएको थियो ।

कटहरी गाउँपालिका–३ का हुलाई पासवानले भने, “धेरैपटक कांग्रेस सरकारमा गयो, अहिले पनि छ । तर, हामीजस्ता दलितको लागि कामै भएन ।”

ग्रामथान गाउँपालिकाकी सुमन चौधरीले पार्टीमा महिला समावेशिताको कुरा उठाइने गरे पनि अवसरमा पछि पारिने गरेको बताइन् । सोही पालिकाका गोपालप्रसाद न्यौपानेले गठबन्धनका नाममा आफूहरूले अरू दलको ‘पेलाइ खेप्नुपरेको’ गुनासो गरे ।

सहभागीले मोरङ र झापाको विकासको आधार मानिएको हुलाकीमार्गको काम चाँडै सक्न, बथनाहा–विराटनगर रेल्वे निर्माण पूरा गर्न, ग्रामीण कृषि उत्पादनमा आधारित लघुउद्यम विकासमा पहल गर्न, पार्टीभित्रको गुटबन्दी अन्त्य गराउन र कांग्रेसलाई तलैबाट चलायमान गराई एक्लै निर्वाचनमा लड्न सक्ने हैसियतमा फर्काउन भन्दै थापाको ध्यानाकर्षण गराए ।

प्रश्नबारे थापाले ‘सबै जिज्ञासा समाधान गर्ने गरी सरकार र पार्टीसमक्ष पुर्‍याउने’ आश्वासन दिए । गौरीगन्ज र रतुवामाई जोड्ने रतुवाखोलामाथिको पुल, हुलाकीमार्ग, बथनाहा–विराटनर रेल्वे लाइनका विषयमा गहन रूपमा सरकारको ध्यानाकर्षण गराउने उनले प्रतिबद्धता जनाए ।

“विकास निर्माणका आयोजना समयमै सम्पन्न गर्न पनि ढंग नपुगेको देखिन्छ । यही हुलाकीमार्ग कतै चार लेन कतै दुई लेन देखेँ,” महामन्त्री थापाले भने, “समय बढ्दा लागत पनि बढेको छ । अब विकास फास्ट ट्रयाकबाट टुंग्याउनुपर्छ । कानुनी अड्चन भए समाधान खोजिनुपर्छ ।”

बोल्नेभन्दा पनि धेरै कुरा र विषय सुन्न संवाद यात्रामा निस्किएको उनले बताए । संवाद यात्रा शनिबार झापाको भद्रपुरबाट थालिएको हो ।