काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले जो कोही व्यक्तिले एसिड प्राप्त गर्न नसक्ने व्यवस्था गर्नुपर्ने बताएका छन् । एसिड (तेजाब) आक्रमणबाट पीडित किशोरी र महिलाका पीडा एवं जीवनकथालाई समेटर निर्माण गर्न लागिएको चलचित्र ‘नमेटिने घाउ’को घोषणा कार्यक्रममा उनले यस्तो बताएका हुन् ।

उनले एसिड परिभाषित रूपमा मात्र प्राप्त गर्न सक्ने व्यवस्था गर्नुपर्नेमा जोड दिए । प्रशासनिक सजगताबिना एसिडको उपलब्धता हुनु नहुने उनले उल्लेख गरे ।

के प्रयोजन, कुन मात्रामा किनेको हो, कति प्रयोग भयो, त्यसको बाँकी अंश छ भने त्यो फिर्ता गर्नेसम्मका कडाइ र व्यवस्थित गरेर मात्र एसिड बिक्री–वितरण गर्ने प्रावधान लागु गर्न आवश्यक रहेको उनले औँल्याए । यसबारेमा आफूले प्रधानमन्त्री पुष्पकमल दाहाल ‘प्रचण्ड’लाई भेटेर ध्यानाकर्षण गराउने उनले प्रतिबद्धता जनाए ।

घटना हुन नदिन सरकारले समयमा नै आवश्यक कदम चाल्नुपर्ने उनले बताए । “...कडाइ र व्यवस्थित गरेर मात्रै एसिड बिक्री–वितरण गर्ने वा एसिडको आवश्यकता पर्नेहरूलाई मात्रै उपलब्ध गराउने त्यो खालको परिपाटी विकास गर्नैपर्छ,” उनले भने, “जोसुकैले जहाँसुकै एसिड प्राप्त गर्न नसकोस् । उपलब्धै नहोस् । परिभाषित ढंगले मात्रै उपलब्ध होस् ।”

अध्यक्ष ओलीले एसिड आक्रमणकारीलाई मृत्युदण्ड नै दिनुपर्छ भन्ने पक्षमा आफू नरहेको बताए । अरू कुनै सजाय दिन सकिनेमा उनले जोड दिए । न्युज एजेन्सी नेपाल