संखुवासभा । संखुवासभाको उच्च हिमाली क्षेत्रमा परेको हिमपातले जनजीवन प्रभावित भएको छ । शुक्रबार रातिदेखि जिल्लाको माथिल्लो भेगमा हलुका वर्षासँगै अहिले हिउँ परिरहेको छ ।

उच्च हिमाली भागमा बाक्लो हिमपात भएकाले जनजीवन कष्टकर बनेको छ । हिमपातले उत्तरी क्षेत्रका किमाथांका नाका, मकालु आधारशिविर, तीनजुरे, गुफापोखरी, मंगलबारेका डाँडाकाँडा सेताम्मै भएका छन् ।

अहिले पनि त्यस क्षेत्रमा हल्का वर्षा र हिउँ पर्ने क्रम जारी रहेको स्थानीयको भनाइ छ । हिउँ परेपछि उच्च हिमाली क्षेत्रमा चिसो अत्यधिक बढेको छ ।

चिसोले बालबालिका, वृद्धवृद्धा र पशुचौपाया बढी प्रभावित भएका छन् । आमसर्वसाधारण घरबाहिर निस्कन सकेका छैनन् । रासस