काठमाडौं । भुक्तानी सेवा प्रदायक ईसेवाले आफ्नो १५औँ वार्षिकोत्सवको अवसरमा विभिन्न १५ किसिमका अफर ल्याएको छ ।

वार्षिकोत्सवको अवसरमा ईसेवाले आमग्राहक तथा प्रयोगकर्ता, एजेन्ट नेटवर्क, मर्चेन्ट, साझेदार बैंक, नियमक निकाय तथा शुभचिन्तकहरूमा आभार व्यक्त गरेको छ । 

कम्पनीले नगदरहित अर्थतन्त्रको परिकल्पना गर्दै सन् २००९ मा बेटा संस्करण र सन् २०१० को जनवरी २५ बाट सेवा सुरु गरेको बताएको छ ।

नगदरहित (क्यासलेस) अर्थतन्त्र निर्माणको बाटोमा नेतृत्वदायी भूमिका खेल्दै १५ वर्ष पुरा गरी १६औँ वर्षमा प्रवेश गरेको कम्पनीले जनाएको छ ।

यस अवसरमा ईसेवाका प्रमुख कार्यकारी अधिकृत जगदीश खड्काले भने, “हामीलाई यो अवस्थामा आउन सहयोग गर्नुहुने आम ईसेवा प्रयोगकर्ता, एजेन्ट नेटवर्क, मर्चेन्ट, पाटनर्स बैंक, नियामक निकाय, कर्मचारी साथी, प्रेस र सम्पूर्ण शुभचिन्तकलाई हार्दिक आभार प्रकट गर्न चाहन्छु । हामीले आगामी दिनमा ईसेवाको मोबाइल एप्स्लाई आम मानिसको हरेक क्रियाकलापमा साथ दिएर सुपर एप्स्को रूपमा विकास गर्ने लक्ष्य लिएका छौँ । मलाई आशा छ, डिजिटल नेपालको यो यात्रामा आम नेपालीले साथ दिनुहुनेछ ।”

कम्पनीले आफ्ना प्रयोगकर्ताको संख्या ८१ लाख पुगेको जनाएको छ । करिब दुई करोड जनसंख्याले ईसेवामार्फत सेवा लिइरहेको कम्पनीको भनाइ छ ।

हाल देशभर करिब दुई लाख ३० हजारको संख्यामा ईसेवा एजेन्ट छन् । ईसेवाले केन्द्रीय कार्यालयसहित सातै प्रदेशबाट सेवा दिइरहेको जनाएको छ । 

१५औँ वार्षिकोत्सवमा १५ अफर
ईसेवाले आफ्नो १५औँ वार्षिक उत्सवको अवसरमा १५ वटा विभिन्न अफर सार्वजनिक गरेको छ । 

अफर माघ ११ (जनवरी २५) देखि माघ २५ (फेब्रुअरी ८) सञ्चालनमा रहने कम्पनीले जनाएको छ । अफर अन्तर्गत इसेवा मार्फत कुनैपनि कारोबार गर्ने एकजनाले आइफोन १५ जित्न सक्नेछन् । 

एयरलाइन्स् टिकट काट्ने १५ जनाले १५ सय १५  रुपैयाँमा आन्तरिक हवाई टिकट पाउन सक्नेछन् । ईसेवा केयर खरिद गर्ने मध्ये एक जनाले १५ हजार रूपैयाँ क्यासब्याक पाउनेछन् ।

यस्तै, ईसेवाबाट होटल बुकिङ गर्नेले १५ सय रूपैयाँ क्यासब्याक पाउन सक्नेछन् । मोबाइल टपअप गर्दा र बिजुलीको बिल तिर्दा १५ प्रतिशतको दरले १५० रुपैयाँसम्मको क्यासब्याक पाइने तथा स्कुल वा कलेजको शुल्क भुक्तानी गर्दा तीनजनाले पाँच हजार रुपैयाँसम्मको क्यासब्याक पाउन सक्ने कम्पनीले जनाएको छ ।