काठमाडौं । भारतका लागि नेपालका पूर्वराजदूत दीपकुमार उपाध्यायले राष्ट्रले भारतको ‘छिमेकी पहिले नीति’बाट फाइदा लिन नसकेको बताएका छन् ।

भारतको ७५औँ गणतन्त्र दिवसको पूर्वसन्ध्यामा बिहीबार काठमाडौंमा आयोजित कार्यक्रममा उनले भारतले आर्थिक विकासमा फड्को मारेको उल्लेख गरे । नेपालले त्यसको फाइदा लिन नसकेको उनले बताए ।

नेपालमा अहिले आर्यघाटमा जाने बेलासम्म सत्तामा बस्ने प्रवृत्ति रहेको भन्दै उनले त्यसलाई त्याग्नुपर्नेमा जोड दिए । उनले सरकारका तर्फबाट भ्रष्टाचारविरुद्ध राम्रो काम भएको बताए । गहिराइमा गएर विषयको छानबिन गर्न उनले आग्रह गरे ।

उपाध्यायले नेपालमा समस्या भएको उल्लेख गर्दै कसरी समाधान गर्ने भन्नेतर्फ सोच्नुपर्ने बेला आएको टिप्पणी गरे ।

यस्तै, नेकपा (एमाले)का नेता डा. राजन भट्टराईले आधुनिक नेपालको राजनीतिक आन्दोलनको जग भारतको स्वतन्त्रतासँग जोडिएको बताए । नेपालका दुई छिमेकी मुलुक अहिले तीव्र समृद्धिको बाटोमा रहेका भन्दै उनले ती देशबाट सिक्न आवश्यक रहेकामा जोड दिए ।

उनले समृद्धि र विकासका निम्ति संविधान र व्यवस्था, वातावरण, राष्ट्रिय–अन्तर्राष्ट्रिय परिस्थिति बाधक नरहँदा पनि मुलुकले गति लिन नसकेको टिप्पणी गरे । वर्तमान सरकार अल्मलिरहेको उनको भनाइ छ । हिमालयन टेली भ्वाइस