काठमाडौं । डोल्पामा सडक निर्माण योजनामा अनियमितता भएको भन्दै अख्तियार दुरुपयोग अनुसन्धान आयोगले मुद्दा दायर गरेको छ । नगरेको कामको भुक्तानी लिए/दिएको आरोपमा संलग्नहरूविरुद्ध विशेष अदालतमा बिहीबार भ्रष्टाचार मुद्दा दायर भएको हो ।  

सरकारी कर्मचारी, वडाका पदाधिकारी र उपभोक्ता समितिका पदाधिकारीहरूको मिलेमतोमा सडक निर्माणमा नगरेको कामको भुक्तानी लिए/दिएको अख्तियारको ठहर छ । तिनीहरूले मिलेमतोमा १० लाख ९७ हजार ८५२ रुपैयाँ भ्रष्टाचार गरेको दाबी आयोगको छ ।

मुड्केचुला गाउँपालिकाका निमित्त प्रमुख प्रशासकीय अधिकृत सिंहराज डाँगी, इन्जिनियर देवराज रावत, सब–इन्जिनियर दीपनारायण यादवलाई आयोगले अभियुक्त बनाएको छ । त्यसअतिरिक्त गाउँपालिका–८ का तत्कालीन कार्यबाहक वडाध्यक्ष धनबहादुर रोकाय, कार्यपालिका सदस्य रामकुमार नेपाली, वडा प्राविधिक इशारा बुढा, उपभोक्ता समितिका अध्यक्ष मानबहादुर रोकाय र कोषाध्यक्ष निर्मला रोकायलाई पनि अभियुक्त बनाइएको छ ।

आयोगले उनीहरूविरुद्ध घुम्चो खेलादेखि महादेवसम्म सडक निर्माणमा भएका काम लुकाउँदै नभएका कामको गलत प्रतिवेदन बनाउँदै भुक्तानीका निम्ति सिफारिस गर्नेदेखि स्वीकृति गर्नेसम्मलाई अभियुक्त बनाएको हो ।

आयोगका अनुसार, उपभोक्ता समिति र गाउँपालिकाबीच सम्झौता भएअनुरुपको काम नगरेको र गरेको कामलाई बढी गरेको भनी प्राविधिक मूल्यांकनसहितको नापी किताबमा प्रमणित गरी भुक्तानी दिए/लिएका छन् ।