काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले क्षेत्री–बाहुनका कारण नेपाल धर्म निरपेक्ष राष्ट्र बनेको आरोप लगाएका छन् । 

मंगलबार काठमाडौंमा आयोजित नीलप्रसाद भण्डारी स्मृति पुरस्कार वितरण कार्यक्रमलाई सम्बोधन गर्दै उनले देशलाई धर्म निरपेक्ष बनाउन राजनीतिक दलभन्दा बढी दोषी बाहुन–क्षेत्री र हिन्दु भन्नेहरू नै रहेको जिकिर गरे ।

"नेपाललाई धर्म निरपेक्ष बनाउन जति पार्टी र नेताहरू दोषी छन्, जति विदेशीहरू दोषी छन्, त्यो भन्दा हामी हिन्दु हौँ भनेर ती पार्टीहरूलाई भोट दिने तपाईंहरूको हात कम दोषी छैन । जबसम्म मत परिवर्तन गनुहुन्न, सच्याउनु हुन्न तबसम्म यो फगत नारामात्रै हुन्छ । वास्तवमा यो देशमा धर्म निरपेक्ष आउनुमा कांग्रेस, कम्युनिस्ट, यी अरू पार्टी कसैलाई दोष दिनु भन्दा पनि क्षेत्री बाहुनको हात दोषी छ," उनले भने ।

उनले मत नसच्याएसम्म हिन्दु राष्ट्र, हिन्दु धर्म र हिन्दु अधिराज्यको माला जपेर मात्रै हिन्दु राज्य नबन्ने बताए । धर्मविहीन राष्ट्रियता र राजनीति हुन नसक्ने उनको भनाइ छ ।