काठमाडौं । प्यालेस्टाइनी लडाकु समूह हमासद्वारा गाजामा बन्धक बनाइएका केही इजरायलीका आफन्त जबर्जस्ती इजरायली संसद् नेसेटमा प्रवेश गरेका छन् ।

आर्थिक गतिविधिमाथि छलफल चलिरहेका बेला प्लेकार्डसहित उनीहरू संसद्भित्र प्रवेश गरेका थिए । उनीहरू सुरक्षा व्यवस्था तोडेर संसद्‌मा छिरेको जनाइएको छ ।

जबर्जस्ती संसद् भवनमा प्रवेश गरेका एकजनाले बोकेको प्लेकार्डमा लेखिएको थियो, “हाम्रा छोराछोरी मरिरहेका बेला तपाईंहरू यहाँ बस्न पाउनु हुन्न ।”

सन् २०२३ अक्टोबर ७ मा हमासले अचानक इजरायलमाथि आक्रमण गरेको थियो । त्यति बेलै हमासले करिब साढे २०० मानिसलाई बन्धक बनाएर गाजातर्फ लगिएको थियो ।

बन्धक बनाइएका १३० व्यक्ति अझै पनि हमासको कब्जामा छन् । केही साताअघि अस्थायी युद्धविराम हुँदा हमासले १०० बन्धकलाई छाडेको थियो । हमास र इजरायलबीच पुनः युद्धविराम गराउन अमेरिका, कतार र इजिप्टले सकिरहेका छैनन् ।

इजरायलले हमासलाई पूर्ण रूपमा ध्वस्त नगरेसम्म युद्ध नरोक्ने उद्घोष गरेको छ । हमासले पनि इजरायली जेलमा रहेका सबै प्यालेस्टाइनीलाई नछाडेसम्म युद्धविराम नगर्ने जनाएको छ । इजरायलको जेलमा हमासका कैयौँ नेता छन् । बीबीसीबाट ।