काठमाडौं । बीवाईडीको आधिकारिक वितरक साइमेक्स इंकले निकै प्रतिक्षित गाडी बीवाईडी सिल नेपाल भित्र्याएको छ । 

विशेष सुविधा, प्रविधि र पर्फर्मेन्सले विद्युतीय गाडी (ईभी)को बजारमा बीवाईडी सिलले क्रान्ति ल्याउने कम्पनीको दाबी छ ।

कस्तो छ गाडी
बीवाईडी सिलमा दुई किसिमका ब्लेड ब्याट्री प्याक रहेका छन् । जुन ६१.४४ किलोवाट क्षमताको र ८२.५६ किलोवाट क्षमताका छन् ।

गाडीको रेन्ज ५७० किलोमिटर रहेको छ । गाडीलाई ३० मिनेटमा नै ३० प्रतिशतदेखि ८० चार्ज गर्न सकिने कम्पनीले जनाएको छ ।

बीवाईडी सिलको ८ इन १ इलेक्ट्रिक पावरट्रेनले रियर–व्हील–ड्राइभ संस्करणमा १५० किलोवाट र २३० किलोवाटको पावर दिन्छ ।

अल–व्हील–ड्राइभ संस्करणमामा ३९० किलोवाट क्षमताको मोटर पावर आउटपुट दिने कम्पनीले जनाएको छ ।

गाडीमा इको, नर्मल, स्पोर्ट र स्नो गरी चार ड्राइभिङ मोड रहेको कम्पनीले जनाएको छ ।

आरामदायी अनुभव
पावर वितरणलाई अप्टिमाइज गर्दै सुरक्षित पर्फरमेन्स र आरामदायी ड्राइभिङको अनुभवका लागि गाडीमा उच्च प्रविधिको टीएसी (इन्टेलिजेन्ट टर्क अड्याप्टेसन कन्ट्रोल) रहेको छ ।

बीवाईडी सिलमा आरामदायक र सानदार अनुभव मिल्ने कम्पनीको दाबी छ ।

गाडीको अगाडिका सिटमा भेन्टिलेसन एवं तताउने र पछाडिका सिट आरामदायी अनुभवका लागि डिजाइन गरिएको छ ।

गाडीमा ‘ओभरसाइज पानोरामिक सनरुफ’ छ । उचित सुरक्षा र उत्कृष्ट ध्वनि, र तातो इन्सुलेसनका लागि गाडीको अगाडिका ढोकाहरू ल्यामिनेटेड ग्लासले डबल–ग्लेज्ड छन् ।

विशेष प्रविधि
गाडीमा टकरावको पूर्वानुमान र चेतावनी, स्वचालित आपतकालीन ब्रेकिङ, रियर क्रस ट्राफिक अलर्ट, रियर क्रस ट्राफिक ब्रेक, आपतकालीन लेन किप असिस्टेन्स, लेन प्रस्थान रोकथामलगायत विशेष र अत्याधुनिक प्रविधि छन् ।

यसबाहेक चालकको सहायतामा ब्लाइन्ड स्पट डिटेक्शन सिस्टम, ईएसपी, ट्र्याक्सन कन्ट्रोल, हिल डिसेन्ट कन्ट्रोल, अटोमेटिक भेहिकल होल्ड, इन्टेलिजेन्ट स्पीड लिमिट इन्फर्मेसन, र इन्टेलिजेन्ट स्पीड लिमिट कन्ट्रोल समावेश छ ।

सिलमा ५.६ इन्चको घुमाउन मिल्ने स्क्रिनमा इन्टेलिजेन्ट भ्वाइस कन्ट्रोल, १०.२५ इन्चको फुल इन्स्ट्रमेन्ट एलसीडी प्यानल, र एन्ड्रोइड अटो र एप्पल कारप्ले सहितका एप छन् ।

प्रिमियम गुणस्तरको अवाजसहितको १२ स्पिकर डाइनाडियो पर्फरमेन्स अडियो प्रणाली र स्मार्टफोन वायरलेस चार्जिङ  सिलमा रहेको अर्को विशेष सुवधा भएको कम्पनीको दाबी छ ।

अत्याधुनिक लाइट टेक्नोलोजीले रातमा ड्राइभिङ गर्दा थप भिजिविलिटीमा मद्दत गर्न प्रकाशको फराकिलो किरण, उच्च बीम असिस्ट, एडप्टिभ फ्रन्ट हेडलाइटहरू र ’फलो मी होम’ जस्ता बहुउपयोगी सुविधा रहेको कम्पनीले जनाएको छ ।

यस्तो छ मूल्य
बीवाईडी सिल तीन फरक भेरियन्टमा उपलब्ध छ । ६१.४४ किलोवाटको ब्याट्री प्याक र ४६० किलोमिटर रेन्ज रहेको गाडीको मूल्य एक करोड पाँच लाख रुपैयाँ रहेको छ ।

यस्तै, ८२.५६ किलोवाटको ब्याट्री प्याक र ५७० किलोमिटर रेन्ज रहेको गाडीको मूल्य एक करोड ३९ लाख रुपैयाँ रहेको छ ।

८२.५६ किलोवाटको ब्याट्री प्याक र ५२० किलोमिटर रेन्ज रहेको गाडीको मूल्य एक करोड ८५ लाख रुपैयाँ रहेको छ ।